لو اشتريت شقة أو أرض بتوكيل من حد، خلي بالك.. ممكن تفقد كل حاجة، والشقة تطير منك.
هيئة المجتمعات العمرانية نزلت تعليمات جديدة لأجهزة المدن الجديدة، بتقول فيها: أي توكيل اتعمل لبيع شقة أو أرض هيتم حصره ومتابعته.
ليه؟ علشان في ناس بتبيع وحداتها من غير ما تروح للجهاز وتعمل تنازل رسمي، وده ممنوع ومخالف.
إيه اللي ممكن يحصل؟
لو ماعملتش تنازل رسمي في خلال 6 شهور وهي المدة اللي حددتها الحكومة، الجهاز من حقه يلغيلك التخصيص يعني تعتبر الشقة أو قطعة الأرض هتبقي مش بتاعتك!
طب التنازل بيكلف كام؟
• 10% من تمن الوحدة مصاريف تنازل
• 2.5% قيمة مضافة
• 2.5% ضريبة تصرفات عقارية
• 1% رسوم نقل ملكية في بنك التعمير والإسكان.
يعني حوالي 16% تقريبًا إجمالي. عشان كده، ناس كتير كانت بتلجأ للتوكيلات عشان تهرب من المصاريف دي.
بيعملوا توكيل عام مخصص مع توكيل إدارة وعقد بيع للنفس والغير.. وكل ده يتسجل في الشهر العقاري.
بس من الآخر، الطريقة دي مش آمنة، والتوكيل ما ينقلش ملكية، ووجوده مش ضمان.، فلو ناوي تشتري أو تبيع، روح للجهاز واعمل تنازل رسمي قبل ما تخسر كل حاجة.
إخلاء مسؤولية إن موقع عاجل الإخباري يعمل بطريقة آلية دون تدخل بشري،ولذلك فإن جميع المقالات والاخبار والتعليقات المنشوره في الموقع مسؤولية أصحابها وإداره الموقع لا تتحمل أي مسؤولية أدبية او قانونية عن محتوى الموقع.
