يا ترى لو انت مستثمر أو حتى عندك مشروع صناعي وعايز تقدم طلب استثمار او عندك شكوى أو استفسار، تعمل ايه، وتتوجه لاي مكان بالظبط، وإزاي تضمن وصول استفسارك او شكوتك أو حتى طلبك؟
بصراحة، الموضوع بقى أسهل من زمان بكتير، لان دلوقتى في تطبيق جديد اسمه "دعم المستثمرين" بيخليك تعمل كل ده من موبايلك وأنت قاعد في مكتبك أو بيتك.
والتطبيق ده عملته وزارة الصناعة والنقل عشان يربطك مباشرة بوحدة خدمة ودعم المستثمرين، وتقدر من خلاله تبعت استفسارك أو شكوتك ويتبعت إشعار على تليفونك إن الطلب وصل واتوجه للجهة المختصة، ولما ييجوا يردوا هيوصلك الرد النهائى على نفس التطبيق وكمان تقدر تبعت استعجال لو الرد اتأخر.
وبداية استخدامه سهلة جدا، أول ما تفتحه بتسجل بياناتك الأساسية زى الاسم ورقم التليفون والبريد الإلكتروني والنشاط والمحافظة، وبعدها تختار إذا كنت عايز تبعت "شكوى" أو "استفسار"، وتكتب التفاصيل ولو عندك مستندات أو صور تدعم طلبك ممكن ترفق لحد 5 صور، وبعدها تضغط "سجل" وخلاص.
والمميز كمان، انك تقدر تدخل على "البروفايل" بتاعك فى أي وقت تتابع فيه موقف الشكوى أو الاستفسار وتشوف وصل لفين، أو تبعت حاجة جديدة، يعني حاليا التطبيق شغال على أندرويد وقريب جدا هيكون في نسخة ل iOS، وده بيوفر وقت ومجهود رهيب بدل ما تروح مشاوير وتتعامل ورقيا.
والأهم، إن الفكرة دي معناها إن الوزارة بقت أكتر سرعة ومرونة فى التعامل مع المستثمرين وده بيخلى حل المشكلات أسرع ويشجع أي حد يفكر يدخل استثمار صناعى وهو مطمن إن فيه قناة مباشرة وسريعة لحل مشاكله أو الرد على استفساراته.
كل ده، غير إن التطبيق بيخدم المستثمرين الكبار، هو كمان بيخدم أصحاب المشروعات الصغيرة والمتوسطة اللى ممكن يكونوا لسه جداد في السوق ومش عارفين يوصلوا للجهة الصح، لان وجود أداة رقمية بالشكل ده بيختصر الطريق ويخليك تتواصل مباشرة مع المسؤولين بدل ما تضيع وقتك بين المكاتب والموظفين.
كمان، الفكرة دي بتزود الشفافية يعني كل طلب أو شكوى ليه رقم متابعة، ومفيش حاجة تضيع أو تتحط في الأدراج وده بيخلى المستثمر يحس إن صوته مسموع وإن في متابعة فعلية لأى مشكلة بيواجهها.
والميزة الحقيقية للتطبيق انه بيحسن بيئة الاستثمار في مصر لان سرعة الرد على الاستفسارات وحل الشكاوى بتخلي المستثمر يحس بالأمان والثقة في انه يحط فلوسه فى السوق المصري، وده معناه جذب استثمارات أكتر، سواء من المصريين أو الأجانب.
وفي النهاية، التطبيق ده خطوة فى مشوار التحول الرقمي اللى الدولة شغالة عليه واللى هدفه انه يخلي الخدمات أسرع وأسهل ويشيل من على المستثمرين عبء الروتين التقليدي، وده كله بيترجم في الآخر لاقتصاد أقوى وفرص استثمار أكتر في كل المجالات.
إخلاء مسؤولية إن موقع عاجل الإخباري يعمل بطريقة آلية دون تدخل بشري،ولذلك فإن جميع المقالات والاخبار والتعليقات المنشوره في الموقع مسؤولية أصحابها وإداره الموقع لا تتحمل أي مسؤولية أدبية او قانونية عن محتوى الموقع.
