ضفت ولادك على بطاقة التموين؟ ولا لسه مستني؟.. تفتكر ليه في ناس كتير مش عارفة تضيف المواليد لحد دلوقتي؟.. وشايف الأفضل التقديم من النت ولا من مكتب التموين؟.. وإيه الشروط والأوراق المطلوبة عشان نسهلها عليك؟.
أكتر سؤال بيتكرر اليومين دول: ينفع أضيف ابني على بطاقة التموين؟.. طب إزاي؟ وإيه الشروط؟ والموضوع بياخد وقت قد إيه؟.. تعالى هقولك كل حاجة عايز تعرفها من غير لف ولا دوخة.
في وسط غلاء الأسعار اللي كلنا حاسين بيه، بطاقة التموين بقت مهمة جدًا لأي بيت مصري وساعات بيكون عندك أكتر من طفل صغير ومش قادر تصرف ليهم دعم لأنهم مش متضافين على البطاقة، لكن دلوقتي، الدولة فعلاً فتحت باب إضافة المواليد الجُدد، خاصة للأسر الأولى بالرعاية.
طيب نبدأ منين؟
لازم نعرف مين ليه حق يضيف أولاده، أول حاجة، لو أنت تابع لفئة محدودي أو منخفضي الدخل، ودخلك الشهري ما يزيدش عن مبلغ معين (بيتم تحديثه حسب قرارات الوزارة – مثلاً كان 3600 جنيه للفرد أو أقل)، ولازم تكون بطاقة التموين بتاعتك شغالة ومفيهاش مشاكل، وطبعا المولود اللي هتضيفه يكون سنه أقل من 18 سنة.
بس تعالى أقولك، عندي طريقين عشات تضيف المولود، أولها أونلاين عن طريق بوابتين، وهما دعم مصر أو بوابة مصر الرقمية.
خطوات الإضافة بتكون إزاي؟.. أول حاجة بتدخل تسجل دخول برقمك القومي ورقم الموبايل وتختار "إضافة أفراد غير مقيدين تموينيًا وتكتب بيانات الطفل (الاسم، تاريخ الميلاد، الرقم القومي لو موجود)، وأهم حاجة تتأكد من البيانات وتضغط إرسال، وهتلاقي رسالة بتقول إن الطلب تحت المراجعة.
أما بقى لو عايزها من مكتب التموين مباشرة، تقدر تروح بنفسك ومعاك صورة شهادة ميلاد كمبيوتر للمولود وصورة بطاقة الرقم القومي لصاحب البطاقة وصورة بطاقة التموين أو إيصال حديث ومستند إثبات دخل (زي مفردات مرتب أو معاش)، ولازم يكون معا رقم موبايل متسجل باسمك، وبتقدم الورق، والموظف بيعمل الإجراءات، وبعد كده بتستنى الرد.
طيب الموضوع بياخد وقت؟.. ايوه لازم يكون عندك صبر، لأن الطلب بيتراجع ولو اتحقق فيك الشروط الطفل بيتسجل على البطاقة وبيبدأ صرف التموين.
بس فيه حاجة مهمة لازم تخلي بالك منها، وهي أنك متحاولش تضيف الطفل لو البطاقة فيها مشكلة (زي موقوفة أو فيها بيانات غلط)، ولو عندك أكتر من طفل، ممكن تضيفهم مرة واحدة لو متاح.
وفي الآخر، التسجيل ده مهم جدا، لأن ببساطة، إضافة مولود على بطاقة التموين بيساوي دعم تمويني أكتر وبيساوي تخفيف عبء على مصاريف البيت، لأن كل فرد في البطاقة ليه حق في الدعم، فلو ابنك أو بنتك مش متسجلين، متتأخرش وخد الخطوة دلوقتي.
إخلاء مسؤولية إن موقع عاجل الإخباري يعمل بطريقة آلية دون تدخل بشري،ولذلك فإن جميع المقالات والاخبار والتعليقات المنشوره في الموقع مسؤولية أصحابها وإداره الموقع لا تتحمل أي مسؤولية أدبية او قانونية عن محتوى الموقع.
