طالب الإعلامي تامر أمين، الفنان محمد رمضان برعاية أسرة الشاب الذي توفي خلال الحفل الذي أقامه في الساحل الشمالي.
وقال أمين خلال برنامج "أخر النهار" المذاع على قناة "النهار": "رحمة الله على الشاب اللي توفي في الحفلة، ربنا يرحمه ويغفر له ويصبر أهله يا رب، أطالب محمد رمضان، بصفته نجم كبير، إنه يشوف أسرة المتوفي ويساندهم ويرعاهم ماديًا، لأن الشاب ده أكيد كان بيشتغل عشان يصرف على عيلته".
وأضاف: "مش عارف إذا كان الشاب متجوز أو عنده ولاد ولا لأ، لأني سمعت إنه شاب صغير عنده 20 أو 22 سنة، لكن في كل الأحوال أسرته دلوقتي في مأتم أرجو من الفنان محمد رمضان إنه يتواصل مع أسرة المتوفي ويشوف احتياجاتهم ويقدر يساندهم نفسيًا وماديًا، ربنا يقدره".
وتابع: "النقطة التانية ودي المهمة، حالة إسهال الحفلات اللي بتحصل بدون ضابط ولا رابط على المنظمين بتوعها، الموضوع ده لازم يبقى فيه وقفة قلت كده من حوالي أسبوعين أو تلاتة لما حصلت أزمة الفنان راغب علامة ومسألة البوسة والقبلة على المسرح".
وواصل: "قلت ابحثوا عن المنظم اللي ساب الستيج والمسرح سبيلًا، أي حد يطلع وأي حد ينزل، يبوس أو يرقص، كأننا في ساحة شعبية مش في حفلة ومسرح محترم، اللي حصل في حفلة محمد رمضان وانفجار أحد الألعاب النارية سببه سوء التنظيم".
وأكمل: "انفجار الألعاب النارية معناه إن الأدوات المستخدمة ما حصلتش عليها مراقبة ولا مراجعة ولا صيانة، فتحولت أنبوبة من أنابيب الألعاب النارية إلى قنبلة موتت واحد وأصابت ستة أشخاص الحمد لله قوي إن ربنا قدر ولطف، لأن كان ممكن تحصل مجزرة أو مذبحة".
واختتم: "ده درس لينا إن إسهال الحفلات ده لازم ينضبط، مش بقول وقفوا الحفلات، لكن لازم يبقى فيه تراخيص للمنظمين المعتمدين اللي يمكن الوثوق فيهم في إقامة حفلات آمنة".
