رصدت بانكير، خلال الساعات الأخيرة، عدد من الملفات على الساحة المحلية والعالمية، التي تم نشرها عبر منصاتها المختلفة، والتي يأتي من أبرزها، انخفاض جديد للذهب، واتفاقية مبادلة ديون مع ألمانيا، ومواعيد حجز وحدات الإسكان الاجتماعي.
نبدأ من سوق الصاغة.. واللى شَهِد تراجع ملحوظ في أسعار الدهب النهارده، وده حسب تصريحات نادي نجيب سكرتير عام شعبة الذهب سابقًا.
سعر عيار 14 نزل لـ 3083 جنيه للجرام.
وسعر عيار 18 هبط لـ 3964 جنيه للجرام.
أما عيار 21 فـ سجل 4625 جنيه للجرام.
وعيار 24 وصل لـ 5285 جنيه للجرام.
وبالنسبة لـ الجنيه الدهب فسعره ارتفع لـ 37 ألف جنيه.. وده ممكن يختلف من تاجر للتاني.. بس السعر ده بيعكس قيمة الدهب اللى فيه.
أما سبيكة الدهب 10 جرام فسجلت حوالي 52850 جنيه.
وسعر أونصة الدهب اللى بتوزن 31.1 جرام سجل تقريبًا 164363 جنيه.
وسبيكة الـ50 جرام بقت بـ 264250 جنيه.
طبعًا الأسعار دي بتتحدد حسب سعر جرام عيار 24.. وممكن تختلف شوية من مكان للتاني على حسب المصنعية أو العُمولات.
نروح لخبر مهم جدًا..
الحكومة المصرية أعلنت إنها شغالة حاليًا على تفعيل اتفاقيات مبادلة ديون مع ألمانيا بقيمة إجمالية 100 مليون يورو.. علشان تموّل بيها مجموعة من المشروعات التنموية في قطاعات مختلفة.. وده ضمن برنامج مبادلة الديون المصري الألماني.. حسب تصريحات الدكتورة رانيا المشاط وزيرة التخطيط والتنمية الاقتصادية والتعاون الدولي.
الدكتورة رانيا وضحت كمان إن أول اتفاقيتين بـ 25 مليون يورو هيتم تفعيلهم واحدة في ديسمبر 2025 والتانية في يونيو 2026.. وكمان بيتم حاليًا إنهاء إجراءات توقيع اتفاقية تالتة بقيمة 50 مليون يورو.. وبكده يكون الإجمالي 100 مليون يورو.
برنامج مبادلة الديون ده بدأ من سنة 2011 مع ألمانيا بـ 240 مليون يورو.. وخلال المرحلة الأولى سنة 2012 اتنفذ بيها مشروعات مهمة زى:
التغذية المدرسية بالتعاون مع برنامج الغذاء العالمي
تحسين جودة التعليم
إعادة تأهيل محطات الكهرباء
الحد من تلوث محطات التوليد الحرارية
مشروع قناطر أسيوط
تحسين مياه الشرب والصرف الصحي
وكل المشاريع دي كانت لصالح وزارات التربية والتعليم والكهرباء والإسكان.
ومن الأخبار اللى بتهم عدد كبير من المواطنين.. أعلن صندوق الإسكان الاجتماعي ودعم التمويل العقاري عن مواعيد التقديم في شقق سكن لكل المصريين 7.
التقديم هيبدأ من يوم الثلاثاء 5 أغسطس 2025 وهيستمر لحد الأربعاء 13 أغسطس 2025.. ما عدا يوم الجمعة والسبت.. والهدف إن الناس تقدر تحجز من غير مشاكل تقنية أو ضغط على السيستم.
اليوم الأول 5 أغسطس هيكون مخصص للناس اللى ليهم أولوية من الإعلانات القديمة الخاصة بمتوسطي الدخل.
اليوم التاني 6 أغسطس هيكون لحجز الشقق في محافظة القاهرة - مدينة حدائق العاصمة.
واليوم التالت 7 أغسطس هيكون للناس اللى متقدمة لحجز وحدات في 15 مايو وبدر.
ونختم مع خبر مهم من مجلس الأعمال المصري الياباني بالتعاون مع غرفة التجارة والصناعة اليابانية واللى نظموا إفطار عمل في طوكيو على شرف المهندس حسن الخطيب وزير الاستثمار والتجارة الخارجية.
اللقاء كان بحضور أكتر من 12 مسؤول تنفيذي من شركات وهيئات يابانية في قطاعات مختلفة.. وده بيعكس الاهتمام المتزايد من اليابان بتوسيع استثماراتها في السوق المصري.
اليابان شايفة في مصر نقطة انطلاق قوية نحو إفريقيا.. وده واضح جدًا من حجم المشاركة والزخم في الاجتماعات الاقتصادية اللى بتتعقد مؤخرًا بين الجانبين.
إخلاء مسؤولية إن موقع عاجل الإخباري يعمل بطريقة آلية دون تدخل بشري،ولذلك فإن جميع المقالات والاخبار والتعليقات المنشوره في الموقع مسؤولية أصحابها وإداره الموقع لا تتحمل أي مسؤولية أدبية او قانونية عن محتوى الموقع.
