من التوت للدولارات.. مشروع الحرير الطبيعي هيغيّر خريطة الإنتاج في مصر

مين كان يتخيل إن دود صغير، بيعيش على ورق التوت، ممكن يفتح بيوت؟.. أهو ده بيحصل دلوقتي. في الوادي الجديد، مصر مسكت أول طرف من الخيط، وقررت إنها ترجع صناعة نسيناها من سنين.. صناعة ناعمة.. لكنها قوية جدًا.. الحرير الطبيعي.
إيه اللي بيحصل؟.. وإزاي هنستفيد من المشروع ده؟

في مدينة الخارجة، حصل حدث مهم جدًا إمبارح السبت.. وزيرة التنمية المحلية ووزير الزراعة ومحافظ الوادي الجديد حضروا توقيع بروتوكول لإنشاء أول مركز متكامل لإنتاج الحرير الطبيعي في مصر. المركز ده هيتبني على مساحة 250 فدان، وهيكون نواة لمشروع قومي ضخم هدفه توطين صناعة الحرير الطبيعي في مصر من تاني.

طب ليه الحرير؟.. وإيه الجديد؟

في العالم كله، الحرير الطبيعي ليه قيمة اقتصادية عالية جدًا، الصين، مثلًا، بتعتبر من أكبر منتجي ومصدّري الحرير في العالم، لكن دلوقتي.. مصر داخلة السباق بقوة.

إنتاج الحرير الطبيعي مش بس رفاهية.. ده صناعة بتفتح أبواب شغل كتير، خاصة للشباب والستات. المشروع هيبدأ بإنتاج حوالي 25 طن حرير طبيعي في أول 4 سنين، وده معناه تقليل الاستيراد، وتوفير العملة الصعبة، وكمان دعم صناعات تانية زي الملابس والسجاد وحتى الصناعات الطبية.

" title="من التوت لدولارات مشروع الحرير الطبيعي هيغيّر خريطة الإنتاج في مصر" frameborder="0">

الجميل بقى؟
الناس مش هتضطر تسافر تشتغل.. فيه خطة لتوزيع "بيض دود القز" وورق التوت للمواطنين يربّوا الدود في بيوتهم. يعني الشغل هيجيلك لحد باب بيتك.. وتحت إشراف مباشر من المحافظة ووزارة الزراعة.

الدولة ماشية بخطة؟ طبعًا.. كل ده بيتم بتوجيهات من الحكومة  والوزارات شغالة مع بعض، كل جهة ليها دور في إنجاح المشروع:

وزارة الزراعة بتوفر الدعم الفني والإرشادي.
التنمية المحلية بتنسق وتتابع التنفيذ.
ومحافظة الوادي الجديد بتوفر اللوجستيات والتسهيلات.

كلام مهم قاله وزير الزراعة: الوادى الجديد هيبقى النموذج الأول، وبعد كده التجربة هتتعمم على باقي المحافظات. يعني بنتكلم على مشروع قومي فعلاً.. مش مجرد مركز وخلاص

إنتاج الحرير الطبيعي في مصر مش بس مشروع.. ده حلم راجع يتحقق من تاني، بيجمع بين الإنتاج، وفرص العمل، وتمكين الشباب والستات، وتقوية الاقتصاد المصري.