مصانع بتتفتح فجأة.. شركات عالمية بتدخل السوق من غير ضجيج، وأرقام بالمليارات بتتحرك في صمت.. ليه مصر بقت فجأة وجهة مفضلة لعمالقة الصناعة؟.. وليه تركيا والصين بالذات بيحولوا استثماراتهم على مصر.
وورا كل استثمار فيه سبب.. وورا كل مصنع خطة.. وورا كل رقم طموحات وخطط عملاقة.. في الفيديو ده هنعرف إزاي مصر بتحول الفرص لدولارات، وإيه الإنجازات اللي اتحققت.. وحجم الاستثمارات قد إيه؟
فيه موجة استثمارية ضخمة ماشية ناحية مصر... وقطاع الملابس الجاهزة والمنسوجات هو البطل في القصة دي، إحنا مش بنتكلم عن مشروع ولا اتنين.
إحنا بنتكلم عن استثمارات أجنبية بمليارات الدولارات، جاية من كبار اللاعبين في السوق العالمي، زي تركيا والصين، وكل ده عشان يصنعوا ويصدّروا من مصر للعالم كله.
رئيس غرفة صناعة الملابس الجاهزة باتحاد الصناعات، محمد عبد السلام، قال إننا منتظرين تدفقات استثمارية تتجاوز 3 مليار دولار في 2026، والسبب؟
60 شركة أجنبية مهتمة تدخل السوق المصري، وكل واحدة ناوية تستثمر من 30 لـ70 مليون دولار! لكن ليه مصر بالتحديد؟
السبب بسيط: تكاليف الإنتاج في تركيا والصين زادت بشكل كبير، من أجور الطاقة والمياه، لمصاريف التشغيل، وبالتالي الشركات دي بدأت تدور على بديل، ولقت الحل في مصر:
بلد عندها عمالة مدربة، أراضي صناعية فيها مرافق وخدمات، وسوق ضخم محلي، وكمان اتفاقيات تجارة مع أوروبا وأفريقيا وأمريكا.
في آخر سنتين بس، دخل السوق المصري أكتر من 1000 شركة تركية صغيرة ومتوسطة، ومنهم 150 شركة فعلاً فتحت مصانع وبدأت إنتاج.. واللي استثمروا بالفعل، ضخّوا حوالي 3 مليار دولار، وكل شركة بتستثمر من 20 لـ30 مليون دولار! والنتايج؟ مشجعة جدًا!
في أول 6 شهور من 2025، صادرات الغزل والنسيج المصري وصلت لـ 577 مليون دولار، بزيادة 7% عن نفس الفترة من السنة اللي فاتت.
وفئة الأقمشة لوحدها صدرت بـ 302 مليون دولار، يعني أكتر من نص الصادرات في المجال ده. والدول اللي بتستورد مننا؟ في المقدمة تركيا، بـ 236 مليون دولار، وراها الجزائر، وإيطاليا، ومجموعة دول أوروبية تانية.
أما بقى قطاع الملابس الجاهزة، فعمل قفزة خرافية: في أول 7 شهور من 2025، الصادرات وصلت لـ 1.939 مليار دولار، بزيادة 26% مقارنة بنفس الفترة من 2024، ولو فضلنا على نفس الوتيرة، هنكسر حاجز 3.7 مليار دولار بنهاية السنة.
والنجاحات دي مش مجرد أرقام...رئيس الوزراء مصطفى مدبولي افتتح إمبارح مصنع "إروجلو جارمنت" التركي في القنطرة غرب، باستثمارات 40 مليون دولار، وعلى مساحة 64 ألف متر مربع، والمصنع هيوفّر فرص عمل 2750 شخص.
ده غير إن مصر جذبت 40 مشروع صناعي في نفس المنطقة باستثمارات بتتجاوز مليار دولار، والمنطقة دي بقت محورية في خطة مصر لتصدير الملابس والمنسوجات، والمستهدف تصدير سنوي يوصل لـ 4 مليار دولار.
اللي بيحصل دلوقتي مش مجرد طفرة، دي نقلة نوعية في اقتصاد بلد بيستغل موقعه، وإمكانياته، واتفاقياته، علشان يبقى مركز صناعي وتصديري إقليمي.
إخلاء مسؤولية إن موقع عاجل الإخباري يعمل بطريقة آلية دون تدخل بشري،ولذلك فإن جميع المقالات والاخبار والتعليقات المنشوره في الموقع مسؤولية أصحابها وإداره الموقع لا تتحمل أي مسؤولية أدبية او قانونية عن محتوى الموقع.
