نمو اقتصادي كبير حققته مصر على كل المستويات.. بس المواطن مش حاسس باللي حصل.. ياتري اية السر في النقطة دي .. وامتي المواطن المصري هيحس بالإصلاحات الاقتصادية اللي عملتها الدولة؟.
من بداية 2014، واجهت الدولة تحدي صعب جدًا وهو إعادة بناء برنامج اقتصادي قوي ومرن يقدر يتعامل مع كل الصدمات الخارجية، خصوصًا أن العالم دلوقتي بيمر بمرحلة من أصعب التحديات الاقتصادية في التاريخ، مع تغيرات جيوسياسية كبيرة بتعيد رسم الخريطة العالمية من جديد.
الأحداث دي انعكست بشكل مباشر على الأسعار، نسبة كبيرة من السلع ارتفعت بأرقام قياسية بسبب تغيرات أسعار الصرف، والنتيجة؟ أعباء اقتصادية إضافية على المواطن البسيط.
طيب.. إيه السبب اللي مخلي المواطن المصري لحد دلوقتي مش حاسس بالإصلاحات الاقتصادية اللي عملتها الدولة؟
أكيد في وقت وانت ماشي في الشارع أو راكب مواصلات، قلت بينك وبين نفسك: الأسعار بتغلى، المرتبات مش مكفية، والحكومة عاملة مشاريع وطرق وكباري جديدة.. والشعب نفسه بيقول: "إحنا مش لاقيين ناكل، إيه لزوم كل ده؟"
لكن الحقيقة إن البرنامج الاقتصادي اللي مصر شغالة عليه قائم بالأساس على إعادة بناء وتأهيل البنية التحتية، وده فعلاً اللي اتعمل، وهو الأساس لأي نهضة اقتصادية أو استثمارات جديدة تدخل السوق، ومن غير البنية دي، مكنش ممكن الشركات تلاقي فرصة للدخول للسوق المصري.
الاستثمارات الكتيرة اللي دخلت مصر زودت الناتج القومي بشكل كبير، وده اللي سمح للدولة تتحرك في اتجاه تطوير حياة المواطن من خلال مبادرات زي حياة كريمة، اللي هدفها تحسين البيئة المعيشية للمواطنين، بجانب خطط ضخمة لإصلاح التعليم والصحة وبناء إنسان مصري جديد.
مصطفى مدبولي، رئيس الوزراء قال إن الوضع الاقتصادي دلوقتي أحسن بكتير من السنين اللي فاتت، وإنه رغم صعوبة التغيرات اللي حصلت في سعر العملة، لكنها خلت الصناعة المصرية أقوى والصادرات زادت بشكل كبير، وكمان التضخم نزل لـ 12% بعد ما كان أعلى بكتير، والهدف يوصل لـ 10% في 2026.
مدبولي شدد إن الدولة مش بس شغالة في مشاريع كبيرة، لكن كمان في ملفات بتمس حياة الناس زي نقل 300 ألف أسرة من مناطق غير آمنة لمساكن آدمية، وتوسيع برنامج "تكافل وكرامة" لـ 7 مليون مواطن، وكمان نجاح الصحة في القضاء على فيروس سي وعلاج ملايين في مبادرات 100 مليون صحة ودي كلها مشروعات بتمس حياة المواطن البسيط.
إخلاء مسؤولية إن موقع عاجل الإخباري يعمل بطريقة آلية دون تدخل بشري،ولذلك فإن جميع المقالات والاخبار والتعليقات المنشوره في الموقع مسؤولية أصحابها وإداره الموقع لا تتحمل أي مسؤولية أدبية او قانونية عن محتوى الموقع.
