تفتكر إيه اللي ممكن يحصل لو القطارات اللي بتركبها يوميًا في المترو واتصنعت هنا في مصر؟.. مش في كوريا، ولا في فرنسا، لأ، في شرق بورسعيد بأيد مهندسين مصريين وبمواصفات عالمية.
القصة بدأت، والبطلة اسمها "نيرك".. إيه اللي بيحصل في شرق بورسعيد؟.. وهيحقق إيه المشروع ده لمصر؟.. وإزاي الدول هتسفيد منه؟..
مصر أعلنت وصول أول دفعة من عربات المترو اللي جاية بنظام SKD، ودي مرحلة وسيطة في الصناعة، بحيث يتسلم المصنع القطار في صورة نصف تصنيع وبعد كده يتم تجميعه محليًا.
الدفعة دي مش مجرد عربيات مترو، دي بداية تنفيذ صفقة تاريخية مع هيونداي روتيم الكورية، لتوريد وتصنيع 320 عربة مترو لصالح الهيئة القومية للأنفاق.
قيمة العقد؟ 656 مليون دولار.
الصفقة دي هتتعمل على مرحلتين:
في الأول العربيات هتيجي شبه مُجمّعة، ويتعمل لها تجميع نهائي جوه مصنع نيرك في شرق بورسعيد، وبعد كده نتحرك تدريجيًا لمرحلة التصنيع الكامل محليًا.
الحكومة اشترطت إن نسبة المكوّن المحلي في المرحلة الأولى ما تقلش عن 30%، والخطة إن النسبة دي تزيد تدريجيًا لحد ما نوصل للاكتفاء الذاتي.
لكن القصة مش بس في القاهرة، في إسكندرية كمان، في مايو 2025 نيرك وقّعت عقد جديد بـ 275 مليون يورو، لتصنيع وتوريد 21 قطار بعدد 189 عربة لمترو أبو قير–محطة مصر.
مدة التنفيذ 38 شهر، والتشغيل متوقع يبدأ في 2026، ومعاه عقد صيانة شامل 10 سنين.
يعني ببساطة، مصر دخلت نادي التصنيع، بدل ما نستورد القطارات كاملة من بره بأسعار مضاعفة، بقينا بنوفّر عملة صعبة، ونخلق فرص عمل، وبنعلّم جيل جديد من المهندسين الصناعيين.
ومصنع نيرك اللي مقام على مساحة 300 ألف متر مربع مش معمول لمشروع واحد، الهدف إنتاج أكتر من 2000 عربة خلال 10 سنين، تشمل المترو، القطار الكهربائي الخفيف، القطارات السريعة، وعربات البضائع.
الخطة إن مصر تتحول لمركز إقليمي لتصنيع وتصدير معدات النقل الكهربائي لكل أفريقيا والشرق الأوسط.
إحنا مش قدام مجرد صفقة، إحنا قدام بداية تحول استراتيجيـ، الحكومة أعلنت وقف استيراد أي عربات مترو جديدة من برّه، يعني ببساطة، اللي هنستخدمه بكرة هيبقى من إنتاج بلدك بأيديك وعلى أرضك.
من أول دفعة من عربات المترو غير مكتملة التجميع اللي جاية من كوريا، لحد ما يبقى عندنا قطار مصري 100%، القصة بدأت، واللي جاي أكبر.
إخلاء مسؤولية إن موقع عاجل الإخباري يعمل بطريقة آلية دون تدخل بشري،ولذلك فإن جميع المقالات والاخبار والتعليقات المنشوره في الموقع مسؤولية أصحابها وإداره الموقع لا تتحمل أي مسؤولية أدبية او قانونية عن محتوى الموقع.
