أشاد الإعلامي عمرو أديب بجهود الدولة في توفير الكهرباء خلال فصل الصيف، مشيرا إلى أن خطط التي نفذت لمنع تخفيف الاحمال كانت ناجحة.
وقال “أديب” خلال برنامج "الحكاية" المذاع على قناة "إم بي سي مصر": "عندي شيء عايز أعترف بيه وأشكر فيه لا أخفيكم سرًا، أنا في بداية الصيف ده كنت متشائم شوية من قدرتنا على توليد الكهرباء في أشهر الصيف، ودي طبيعتي أنا شخص متشائم كنت خايف إننا ما نقدرش نعمل هذا الأمر".
وأضاف: "لما ابتدت درجات الحرارة تبقى في أسوأ ظروفها، كان عندي قناعة إنه في أي لحظة النور هيتقطع لكن يجب أن أعترف إنه حدثت إدارة جيدة جدًا لتوليد الكهرباء هذا الصيف".
وتابع: "طبعًا إحنا ما بنحسش بالمصيبة غير لما تحصل يعني طول ما الكهرباء موجودة ما بنجيبش سيرتها، لكن أول ما تتقطع خمس دقائق بنقلب الدنيا حضراتكم عارفين، أنا كنت واحد من اللي عملوا مهرجانات وقت ما كان النور بيقطع، ودخلت في خناقات، وقلت مش هتيجي تاني زي السنين اللي فاتت".
وأوضح: "السنة دي، الحمد لله، نقدر نقول عدينا الشبكة القومية ربنا يبارك فيها، خمسة وخميسة، لأنها فعلًا عبرت هذا الصيف بنجاح أنا بشكر المسؤولين اللي عملوا عدد من الإجراءات اللي وفر الطاقة واللي وفر فلوس الطاقة واللي شغّل المحطات".
وأكمل: "علشان يضمنوا صيف آمن سواء للمنازل أو للمصانع أو لكل الجهات نجحت الحكومة المصرية هذا الصيف إنها توفر النور والطاقة، يبقى فيه مروحة، يبقى فيه تكييف، يبقى فيه مصنع شغال".
وأوضح: "اتدفعت فلوس كتير جدًا، وتم تدبير هذه الأموال، واستيراد الغاز، وتوفير المازوت، وتشغيل المحطات. وكانت النتيجة إن الكهرباء فضلت موجودة 3 شهور ورا بعض، لم تنقطع يومًا واحدًا".
وذكر: "مرة واحدة فقط حصل انقطاع حوالي 10 دقائق، ساعتها قلت آه يا عمرو، يا فرحة ما تمت لكن رجعت الكهرباء تاني الحمد لله، أنا بشكر كل من عمل على هذا الملف فعلًا ما حسّيناش بأي مآسي، ولا أي مشاكل".
واختتم: "الحمد لله، الجو ابتدى يتحسن، وموجات الحرارة العالية بدأت تقل، وما شفناش أي تخفيف أحمال رغم إننا بنتكلم على أرقام استهلاك مزعجة جدًا لكن بفضل الله قدرنا نكمل طول الصيف".
