حل المطرب حمزة نمرة، ضيفا في برنامج “أجمد 7” عبر إذاعة نجوم إف إم مع الإعلامية جيهان عبدالله، متحدثا عن معاناته الشديدة مع فكرة الكمال الذي يحلم دائما أن يصل إليها.
وقال حمزة نمرة: “كنت بعاني من فكرة إني عاوز أوصل للكمال، ودايمًا كان عندي إحساس إني مش بقدم أحسن ما عندي، وده كان بيرهقني جدًا ويأخرني سنين في أعمالي، أول قرار شخصي أخدته الفترة اللي فاتت، إني أتقبل فكرة إن أنا بني آدم وعندي قدرات، وده اللي بيميزنا كبشر”.
حمزة نمرة يصدر ألبوم “قرار شخصي”
أصدر الفنان حمزة نمرة ألبوم غنائي “قرار شخصي” حقق من خلاله نجاحا فنيا وجماهيريا كبيرا، بعد ان طرحه عبر موقع الفيديوهات “يوتيوب” وعدد من المنصات الموسيقية، وتفاعل الجمهور معه بشكل كبير.
حمزة نمرة يوجه رسالة لـ جمهوره بعد نجاح ألبوم “قرار شخصي”
وجه المطرب حمزة نمرة رسالة إلى جمهوره بعد نجاح ألبوم “قرار شخصي” عبر حسابه الرسمي بموقع “إنستجرام”، وكتب: “زمان، لما كان حد يسألني في أي لقاء: هل حاسس إنك مش واخد حقك فنيًا؟ كنت باقعد أفكر شوية وأبقى مش متأكد من الإجابة، وغالبًا بأكون أقرب لفكرة إني فعلًا كده، لحد ما في يوم قعدت بيني وبين نفسي وسألت نفسي السؤال ده بجد، واكتشفت إن ربنا إداني أكتر مما أستحق، ووصلني لأبعد مما يفترض إني أوصل له بحسابات الدنيا وبالورقة والقلم”.
وأضاف حمزة نمرة: “واحد ماشي عكس التيار، لا بيغني مواضيع شبه الرائج، ولا بيعمل موسيقى شبه الرائج، ولا بيلبس شبه الرائج، ولا بيفرض نفسه بالزن على الودان، وفوق ده كله انطوائي وما بيعرفش يخلق علاقات ومعارف في مجاله، بالورقة والقلم وقوانين الطبيعة، المفروض يبقى بالكتير على هامش الفن ويبقى مسموع في دوائر ضيقة جدًا، لكن إن اللي بأقدمه ينتشر بالشكل ده، وإن ألبوماتي تنزل في موسم الصيف، فتنافس فئات البوب وتبقى رائجة في كل المنصات، فده فضل من ربنا كبير أوي، ده مش حقي ده أكتر من حقي بمراحل، فالحمد لله رب العالمين”.
واختتم حمزة نمرة منشوره قائلا: “باشكركم إنكم كنتم سبب في النجاح ده، كل واحد سمعني واتأثر، اتكلم عني وسط صحابه، نشر أغنية ليا، حضر لي حفلة، ربنا جعلكم سبب في إن فني يفضل عايش، وسامحوني على أي تقصير أو حاجة كانت أقل من توقعاتكم، ده اللي ربنا يسره لي لتقديمه وربنا يرزقنا حسن النوايا، وأخيرًا أشكركم من قلبي.. ماشي على الله.. يتكعبل لو بص وراه”.
