يا ترى إيه المكاسب اللي مصر هتحققها مع بدء تشغيل 4 مناطق حرة جديدة، وليه القرار ده مهم للاقتصاد في التوقيت ده بالذات؟
في الحقيقة، الحكومة وافقت في الايام الاخيرة، على إنشاء 4 مناطق حرة عامة في العاشر من رمضان وأكتوبر الجديدة وبرج العرب الجديدة والعلمين الجديدة، والقرار ده جه بعد ما وصلت نسبة الإشغال في ال 9 مناطق الحرة اللي شغالين دلوقتي لـ95%، يعني السوق محتاج توسع حقيقي.
ونقدر نقول، ان الهدف الأساسي من المناطق دي هي إن إنتاجها كله يتوجه للتصدير، وده معناه إننا مش هنزاحم المصانع اللى شغالة للسوق المحلي وكمان بنمشي على خطة وزارة الاستثمار والتجارة الخارجية اللي مستهدفة توصل بالصادرات ل 140 مليار دولار بحلول سنة 2030.
كمان في ميزة تانية، وهى إن المناطق الجديدة هتركز على التحول الأخضر، يعني هيكون في التزام بالمعايير البيئية وده بيفتح أبواب أوسع للأسواق الخارجية اللي بقت النهاردة بتدي أولوية للمنتجات الصديقة للبيئة.

والأهم كمان إن إنشاء المناطق دى هيقدر يساعد على جذب استثمارات أجنبية مباشرة خاصة إن في طلب متزايد على الاستثمار الصناعي والحكومة بالفعل بتسابق الزمن عشان تجهز البنية التحتية للمناطق دي بالتعاون مع هيئة المجتمعات العمرانية.
واللي جاي مش قليل، وده لان الهيئة العامة للاستثمار بتخطط كمان عشان تفعّل 3 مناطق حرة عامة جديدة غير الأربع مناطق اللي تم الإعلان عنهم، وده معناه إن عدد المناطق الحرة العامة في مصر ممكن يتضاعف ل 16 منطقة قريب جدا، وده هيساهم في زيادة الصادرات وكمان خلق فرص عمل جديدة وضخ عملة صعبة تدعم الاقتصاد الوطني.
ومن الحاجات المهمة كمان، إن المناطق الحرة دي هتفتح الباب قدام الصناعات التكنولوجية والقطاعات الحديثة زي الإلكترونيات والطاقة الجديدة والمتجددة، وده هيخلى مصر مش بس بتنافس في الصناعات التقليدية لكن كمان بتثبت نفسها في مجالات المستقبل.
وكمان، لازم نفتكر إن كل منطقة حرة جديدة معناها فرص عمل مباشرة وغير مباشرة لعشرات الآلاف من الشباب، ومع كل مشروع استثماري بيتفتح جوه المناطق دي بيبقى فى سلسلة كاملة من الخدمات اللوجستية والنقل والتخزين اللي هتتحرك وتزود النشاط الاقتصادي على مستوى الجمهورية.
وفيه حاجة مهمة جدا كمان لإنشاء المناطق الحرة الجديدة وهي ضمانة استدامة تدفق الدولار والعملة الصعبة في السوق المصرفي ودا معناه زيادة المعروض من النقد الأجنبي وبالتالي استمرار هبوط الدولار قدام الجنيه وزيادة القوى الشرائية للعملة المحلية ولو ده حصل أسعار السلع المستوردة هتنزل طبعاً.
وفي النهاية، تقدر تقول إن إنشاء ال 4 مناطق الحرة مش مجرد توسع صناعي لكنه خطوة استراتيجية عشان مصر تثبت وجودها فى السوق العالمي وتحقق نمو مستدام في الصادرات وتخلي الاقتصاد عنده قدرة أكبر على المنافسة وجذب الاستثمارات.
إخلاء مسؤولية إن موقع عاجل الإخباري يعمل بطريقة آلية دون تدخل بشري،ولذلك فإن جميع المقالات والاخبار والتعليقات المنشوره في الموقع مسؤولية أصحابها وإداره الموقع لا تتحمل أي مسؤولية أدبية او قانونية عن محتوى الموقع.