يا ترى إيه قصة المشروع الصيني الجديد اللي هيدخل منطقة القنطرة غرب في اقتصادية قناة السويس، وليه ده ممكن يبقى نقلة صناعية كبيرة، وإيه هي المكاسب الاقتصادية منها؟
في الحقيقة، المشروع الجديد في المنطقة الاقتصادية لقناة السويس، عبارة عن مصنع لشركة "تشانجتشو رامادا" لصناعة المنسوجات، وتحديدا أقمشة المنزل والملابس، وفي الحقيقة دي استثمارات كبيرة لأنها بتوصل ل22,6 مليون دولار، يعني حوالي مليار و130 مليون جنيه مصرى.
والمصنع ده هيقام على مساحة ضخمة 80 ألف متر مربع، وهيشتغل ب 1500 موظف مباشر، وطاقته الإنتاجية مش بسيطة خالص دى هتوصل ل 5 آلاف طن من الأقمشة سنويا، بواقع 4 ملايين طقم أغطية سرير، وكمان مليون طقم موكيت سيارات.
والمفاجأة ان 90% من الإنتاج هيكون موجه للتصدير للأسواق العالمية، وده معناه إن المشروع مش بس هيساهم في الصناعة المحلية لكن كمان هيعزز صادرات مصر وهيدخل عملة صعبة للاقتصاد.
واللي يميز المشروع دع هو إنه تابع لشركة صينية متخصصة وهي ليها سلسلة تصنيع متكاملة من خامات الغزل للنسيج والطباعة والصباغة، والتشطيب، وحتى تصنيع منتجات جاهزة زي البطانيات والسجاد، يعني مش مجرد مصنع عادي، ده مصنع متكامل بمنتجات متنوعة وجودة عالمية.
لكن الموضوع مش بس عن مشروع واحد، ده رئيس هيئة اقتصادية قناة السويس وليد جمال الدين، أكد إن في المنطقة الصناعية بالقنطرة غرب فيه 32 مشروع ضخم لحد دلوقتي، باستثمارات حوالي 822 مليون دولار، وبتوفر حوالي 45,6 ألف فرصة عمل مباشرة.
والكلام ده بيوضح قد إيه المنطقة بقت قاعدة صناعية قوية ف قطاع الغزل والنسيج والملابس، وبتستهدف تصدير إنتاجها للأسواق العالمية مستغلة الموقع الاستراتيجي لقناة السويس كحلقة وصل بين قارات العالم.
كمان، الهيئة مش بتقف عند كده لا دي بتكثف جهودها لجذب استثمارات أكتر في القطاعات اللي بتستهدفها، وكمان بتقدم حوافز مغرية وبتوفر بنية تحتية ممتازة، ودي كلها عوامل بتخلي المنطقة وجهة مفضلة للمستثمرين خاصة مع استقرار الأوضاع السياسية والاقتصادية في مصر.
يعني باختصار، مشروع تشانجتشو رامادا مش بس إضافة صناعية عادية، لا ده مشروع هيعمل قلبان في منظومة النسيج والتصدير في مصر، وهيعزز مكانة القنطرة غرب كقاعدة صناعية متكاملة تخدم الاقتصاد المصري وتفتح فرص عمل كبيرة للشباب.
إخلاء مسؤولية إن موقع عاجل الإخباري يعمل بطريقة آلية دون تدخل بشري،ولذلك فإن جميع المقالات والاخبار والتعليقات المنشوره في الموقع مسؤولية أصحابها وإداره الموقع لا تتحمل أي مسؤولية أدبية او قانونية عن محتوى الموقع.
