يا ترى إيه الحكاية وره استقرار وانخفاض سعر الدولار قدام الجنيه في مصر، رغم إن الدولار عالميا عامل قفزة الفترة اللي فاتت هل ده معناه ان ايام الجنيه جاية؟
الأرقام بتقول إن سعر الدولار دلوقتى في البنوك المصرية بيدور حوالين 48.48 جنيه للشراء و48.62 جنيه للبيع، وده بعد فترة كان فيها الدولار بيطلع بشكل ملحوظ، لكن اللى بيحصل إن في عوامل داخلية وخارجية بتلعب دور مهم، أولها تحسن نسبي في تدفقات العملة الأجنبية من السياحة وكمان الصادرات ده غير تحويلات المصريين بره.
وعالميا، الدولار ارتفع شوية قدام العملات الرئيسية بعد قرار الفيدرالي الأمريكي إنه يثبت الفايدة زي ما السوق كان متوقع، لكن في نفس الوقت البيانات الاقتصادية الضعيفة في أمريكا خلت المستثمرين يتوقعوا خفض الفايدة قبل نهاية السنة، وده بيضغط على الدولار على المدى الطويل.
وعندنا في مصر، البنك المركزي بيحاول يوازن السوق عن طريق إدارة مرنة لسعر الصرف، ومع دخول استثمارات أجنبية قصيرة الأجل والبي هي اسمها "هوت ماني" وتحسن في المعروض من الدولار، فده ساعد على استقرار السعر، وكمان في تراجع نسبي في الطلب على العملة الأمريكية مع انخفاض الواردات في بعض القطاعات.
وفي نقطة مهمة، إن أي تحسن فى موارد العملة الصعبة زي الغاز أو قناة السويس بيخلي البنك المركزي عنده مساحة أكتر لدعم الجنيه، ولو الاتجاه ده كمل فممكن نشوف صحوة للجنيه المصري تدريجيا، لكن ده مرتبط باستمرار تدفق الدولار من مصادره الأساسية وعدم حدوث أى صدمات خارجية.
وزي نا قولنا، ف تأثير من التحويلات اللي جاية من المصريين في الخارج، واللي زادت بعد ما البنوك وفرت أسعار كويسة وتسهيلات في التحويل، وده ساعد على ضخ سيولة دولارية في السوق بشكل مستمر، وخلا الضغط على الدولار يقل شوية.
غير كده، الحكومة شغالة على صفقات استثمارية جديدة مع مستثمرين أجانب خاصة في مجالات الطاقة المتجددة والبنية التحتية، وده بيضمن دخول عملة صعبة إضافية في الفترة اللي جاية واللى ممكن تدعم استقرار أو حتى تحسن موقف الجنيه.
بردو، ما ننساش إن أسعار السلع العالمية بدأت تستقر نسبيا خاصة الحبوب والزيوت وده قلل فاتورة الاستيراد لمصر، وبالتالي قل الطلب على الدولار في سداد الفواتير الخارجية، وده انعكس إيجابي على المعروض منه.
والخلاصة هي ان اللى بيحصل دلوقتي هو مزيج من عوامل داخلية بتحسن المعروض من الدولار وعوامل عالمية بتضغط على قيمته، والنتيجة إن الجنيه واخد نفسه شوية لكن الاستمرار فى الاتجاه ده محتاج سياسات اقتصادية محافظة ودعم قوي لزيادة موارد العملة الصعبة.
إخلاء مسؤولية إن موقع عاجل الإخباري يعمل بطريقة آلية دون تدخل بشري،ولذلك فإن جميع المقالات والاخبار والتعليقات المنشوره في الموقع مسؤولية أصحابها وإداره الموقع لا تتحمل أي مسؤولية أدبية او قانونية عن محتوى الموقع.
