في خطوة مهمة جدًا، وبناء على توجيهات الرئيس السيسي، الدولة بدأت فعليًا في تطوير وثيقة التأمين للمصريين اللي عايشين أو شغالين بره مصر.. بس هل هيستفادوا منها إزاي؟.. وليه التطوير ده حصل؟
مصر وهي في زحمة التوترات الجيوسياسية والأيام الصعبة اللي بنعيشها في المنطقة، مقدرتش تنسى ولادها اللي شغالين بره، وده بعد ما أعلنت وزارة الخارجية والهجرة، بالتعاون مع هيئة الرقابة المالية، أن فيه وثيقة تأمين جديدة أشمل وبتغطي عدد أكبر من المصريين، وكمان زاد مبلغ التأمين من 100 ألف لـ250 ألف جنيه في حالة الوفاة أو العجز الكلي.
ليه التطوير ده حصل؟
التطوير اللي بتعمله مصر كل شوية في كل القطاعات، ده عشان تحمي المصريين ويعيشوا حياة كريمة، خصوصا اللي عملته في رفع قيمة وثيقة التأمين عشان تحمي المصريين اللي بره وتوفر لهم ولأسرهم أمان مادي لو حصلت لهم ظروف صعبة، سواء وفاة أو إصابة أو حادث، لا قدر الله، وكمان ده جزء من خطة أكبر لربط المصريين بالخارج بوطنهم وتوفير ليهم خدمات تأمينية محترمة.
" title="مصر ترفع قيمة وثيقة التأمين للمصريين بالخارج إزاي تشترك فيها؟" frameborder="0">
مين اللي يقدر يشترك؟
زمان كانت الوثيقة بس للناس اللي معاهم تصريح عمل، لكن دلوقتي الموضوع اتوسع وبقى يشمل كل المصريين اللي شغالين أو عايشين بره، سواء معاهم تصريح عمل أو لأ، وكمان أسرهم.
طيب إزاي اللي مسافر يشترك في الوثيقة دي؟
سهل جدًا، تقدر تشترك عن طريق، موقع المجمعة المصرية لتأمين السفر وتطبيق الموبايل أو حتى عن طريق الواتساب، يعني الدنيا بقت أسهل ومفيش ورق كتير ولا مشاوير.
طيب ولو حصل وفاة أو حادث؟
لو وفاة طبيعية، المجمعة بتدفع تكلفة نقل الجثمان لحد 250 ألف جنيه، ولو حادث بتدفع التكاليف كمان وبتوزع باقي المبلغ على الورثة حسب إعلام الوراثة، ولو الشخص اتدفن بره، المجمعة بتدفع نفس المبلغ اللي كانت هتدفعه لنقله لمصر... بس فيه شرط مهم؟، لازم اللي عليه التأمين يكون عمره من 18 لـ 70 سنة وقت الحادث.
الكلام ده ابتدى من إمتى؟
الوثيقة الجديدة شغالة من يوليو 2025، يعني خلاص اتفعلت، واللي عايز يستفيد منها يقدر يبدأ من دلوقتي.
الخلاصة؟.. الدولة بتشتغل بجد علشان تحافظ على ولادها في أي مكان في العالم، والوثيقة دي خطوة كبيرة في طريق حماية المصريين في الخارج، وده كله من غير تعقيدات ولا إجراءات صعبة، بس افتكر تشترك وتضمن حقك وحق أسرتك.
إخلاء مسؤولية إن موقع عاجل الإخباري يعمل بطريقة آلية دون تدخل بشري،ولذلك فإن جميع المقالات والاخبار والتعليقات المنشوره في الموقع مسؤولية أصحابها وإداره الموقع لا تتحمل أي مسؤولية أدبية او قانونية عن محتوى الموقع.
