يا ترى إيه كامل الوزير نزل بنفسه فجأة منطقة العبور الصناعية، ايه اللي شافه جوه المصانع، وهل الجولة دي هتكون قبلة حياة جديدة للصناعة المصرية؟
في الحقيقة، الفريق كامل الوزير نائب رئيس الوزراء للتنمية الصناعية ووزير الصناعة والنقل، نزل جولة مفاجئة على 3 مصانع كبار في مدينة العبور.
واللي حصل إن الجولة دي جاية في وقت حسساس، وهو وقت بنحاول فيه نرجع الصناعة لمكانها الطبيعي ونقلل استيراد ونفتح فرص عمل ونصدر أكتر.
خليها نبدأ من أول مصنع، وهي شركة ضخمة للصناعات الغذائية مساحتها ٣٥ ألف متر مربع، بتنتج كل سنة حوالي ١٧٠ ألف طن أجبان، و٧٠ ألف طن لبن معقم، و٥٠ مليون لتر عصير، وبيشتغل فيها أكتر من ٢٥٠٠ عامل، وبتصدر لأكتر من ٣٣ دولة، من ضمنهم أمريكا وروسيا والخليج، وفوق كل ده صادراتها وصلت ٢٠ مليون دولار سنة ٢٠٢٤.
وكمان، الوزير شاف خطوط التعبئة زي التتراباك والجبن الأبيض ومعرض المنتجات، وقال جملة مهمة جدا وهي ضاعفوا إنتاج الأجبان عشان السوق محتاج.
بعدها، الوزير راح مصنع سيراميك وبورسلين مساحته ٧٠ ألف متر، بينتج ١٥ مليون متر سيراميك سنويا، وبيصدر لأوروبا وأمريكا والشرق الأوسط، كامل الوزير وقف وقال ان ده المصنع الوحيد في الشرق الأوسط اللي بينتج بورسلين سمك ٢ و٣ سم، يتحمل شغل المطارات والموانئ والطرق، ومفيش هالك، يعني كل حاجة بتعاد تدويرها، يعني تكلفة أقل وجودة أعلى، وده خلاه يقرر إن كل البلاط اللي في المترو والمحطات الجاية هيبقى من هنا من مصنع مصري.
وآخر محطة كانت مصنع ضخم للصلب والصاج، مساحته ٤٦ ألف متر، واستثماراته ٣ مليار جنيه، بينتج ٩٠٠ ألف طن في السنة، وبيصدر لأفريقيا وأوروبا وأمريكا.
والمصنع ده في خطوط إنتاج بتكلف ٦ مليون يورو، وأول مرة نشوفها في مصر والشرق الأوسط، وبتشتغل بدقة عالية لتصنيع الصاج للأجهزة المنزلية، وهنا الوزير وقف وسط الماكينات وقال للعمال ان الصناعة مش هتقوم إلا بالعامل المخلص، المدرب، اللي بيحب شغله، وأكد كمان على تدريب الشباب وتوريث المهنة وتصدير الفنيين بره كمان.
طيب.. هل الجولة دي مهمة؟
جدا، وده لانهة بتبعن ٣ رسائل واضحة، اولها ان الحكومة نازلة بنفسها تشوف المصانع على الأرض، وتاني حاجة مفيش هزار في ملف الصناعة ده أمن قومي، وتالت حاجة هي دعم مباشر للتصدير والتوطين، والصناعة الوطنية، والاهم إن الوزير نفسه قال ان مصر هتبقى مركز صناعي إقليمي، وده مش كلام. ده فعل.
والخلاصة هي، ان الجولة دي مش صدفة، دي رسالة بان الدولة ناوية تضخ دم جديد في الصناعة وتشغل آلاف الشباب وتوقف الاستيراد العشوائي، وكمان تدي أولوية للمنتج المصري في كل مشروع قومي، ولو المصنع بيثبت كفاءة وجودة، الدعم هيجيله لحد عنده.
إخلاء مسؤولية إن موقع عاجل الإخباري يعمل بطريقة آلية دون تدخل بشري،ولذلك فإن جميع المقالات والاخبار والتعليقات المنشوره في الموقع مسؤولية أصحابها وإداره الموقع لا تتحمل أي مسؤولية أدبية او قانونية عن محتوى الموقع.
