يا ترى ايه حكاية المشروع اللي قطرهتنفذه في الساحل الشمالي؟ وايه علاقة المشروع بتطوير منطقة رأس الحكمة؟ وايه المشروعات اللى هتتعمل فى المنطقة الجديدة؟
المحادثات المصرية القطرية وصلت لمرحلة اللمسات الأخيرة حوالين مشروع سياحي ضخم في منطقة علم الروم على الساحل الشمالي .. الاستثمارات الأولية المقدّرة للمرحلة المبدئية ٤ مليار دولار.
الاتفاق المبدئي وفقا للمعلومات اللى نشرها موقع الشرق التابع لوكالة بلومبرج طُرح خلال اجتماع ضم رئيس الوزراء المصري د مصطفى مدبولي مع نظيره القطري الشيخ محمد بن عبد الرحمن آل ثاني .. الاجتماع رسّخ رغبة الجانبين في تطوير مشروع كبير على البحر المتوسط وفتح مسار تفاوض تفصيلي حواليه.
المخطط بيستهدف مساحة بتوصل لحوزالى ٦٠ ألف فدان تتخصّص بنظام حق الانتفاع لصالح جهاز قطر للاستثمار .. يعني الدولة محتفظة بملكية الأرض لكن بتدي حق تطوير واستغلال لفترة طويلة مقابل قيمة وتوزيعات مستقبلية .. النموذج قريب من الصيغ اللي شفناها في صفقات ساحلية كبيرة مؤخرا.
الخطة الأولية بتتكلم على مدينة سياحية متكاملة .. منتجعات سياحية عالمية .. وحدات سكنية فاخرة .. مراكز تجارية وترفيهية .. مرسى لليخوت .. ومرافق خدمية متطورة .. الرؤية مستوحاة من تجربة راس الحكمة اللي قلبت موازين الاستثمارات الساحلية في مصر.
المرحلة الأولى هتغطي ما بين ٢٠٪ لـ٢٥٪ من إجمالي مساحة المشروع .. مش قليل لما تحسب إن المساحة الكلية عشرات الآلاف من الأفدنة .. فحتى الربع الأول ده ممكن يبقى مدينة مصغّرة قائمة بذاتها.
المعلومات الأولية بتشير كمان إن حصة الحكومة المصرية من الإيرادات ممكن توصل لحد ١٥٪ بعد تنفيذ كل المراحل .. وده غير عوائد غير مباشرة زي الوظايف والبنية التحتية والتدفقات الدولارية المرتبطة بالمبيعات السياحية والعقارية.
طب ال ٤ مليار دولار عبارة عن إيه؟
الـ٤ مليارات الأولية مش كلها مباني وفنادق .. الرقم بيشمل قيمة حق الانتفاع بالأرض بالاضافة الى مساهمة في تكاليف البنية التحتية اللي الحكومة هتنفذها في المنطقة .. تقسيمة الفلوس دي مهمة لأي حد بيفكر يقارن بين الصفقات الخليجية المختلفة على الساحل.
علم الروم بتقع شرق مرسى مطروح .. سُمّيت كده عشان كان فيها حصن روماني قديم .. شواطئ هادية وطبيعة لسه بكر .. وبتبعد تقريباً ٥٠ كيلومتر عن راس الحكمة اللي خطفت الأضواء باستثمار إماراتي تاريخي.
طب ليه كل الناس بتقارن المشروع ده برأس الحكم؟
لأن صفقة الإمارات في راس الحكمة ضخّت تمويلات ضخمة واتقال إنها وصلت حوالى ٣٥ مليار دولار بقفزة تمويلية للاقتصاد المصري .. وكانت سابقة مهمة خلت الملفات الساحلية التانية ومنها ملف قطر تكسب زخم من نوع مختلف.
والإجراءات ماشية في مسار تخصيص الأرض واستكمال التراخيص .. ولو المباحثات خلصت بشكل ناجح فالمتوقّع إعلان رسمي خلال ٢٠٢٥ .. لسه تفاصيل الجدول الزمني للبناء والتسليم قيد التفاوض بس الاتجاه العام إيجابي حسب المصادر.
وما تنساش إن القاهرة والدوحة أعلنوا قبل كده إنهم شغالين على حزمة استثمارات قطرية مباشرة قد تصل لـ٧.٥ مليار دولار لمصر .. والملف الساحلي ده مرشح يكون قطعة أساسية في الباكدج دي لو تم الإقفال.
مصر محتاجة تدفقات دولارية وبتسعى تقلل عبء الدين الخارجي وبتحاول توسّع دور القطاع الخاص .. الحكومة حاطة أهداف طموحة لجذب ٤٢ مليار دولار استثمارات أجنبية مباشرة في العام المالي ٢٠٢٥/٢٠٢٦ اللي بدأ أول يوليو .. الاستثمارات الخليجية الضخمة في السياحة والعقارات جزء أساسي من الخطة دي.
إخلاء مسؤولية إن موقع عاجل الإخباري يعمل بطريقة آلية دون تدخل بشري،ولذلك فإن جميع المقالات والاخبار والتعليقات المنشوره في الموقع مسؤولية أصحابها وإداره الموقع لا تتحمل أي مسؤولية أدبية او قانونية عن محتوى الموقع.
