أمينة ترد على الإساءة:"البعض أصبح مستفزًا وقليل الأدب"

أعربت المطربة أمينة عن غضبها واستيائها الشديد من الإنتقادات والتعليقات التي وجهت لها على الفيديوهات المنتشرة لها، أثناء تقديمها واجب عزاء المطرب الشعبي الراحل أحمد عامر. 

أمينة ترد على الإنتقادات المُسيئة لها بعد عزاء أحمد عامر

وكتبت أمينة من خلال حسابها الرسمي عبر موقع تبادل الصور والفديوهات القصيرة إنستجرام، قالت: "استفزني كومنتات لاقيتها على فيديوهات عزاء أحمد عامر، الله يرحمه ويحسن إليه، والناس معذورة برضه، العناوين المكتوبة على الفيديوهات لا تمت للواقع بصلة، روحت عزيت نقابة المهن الموسيقية، كل ده تمام، يطلع واحد وغيره كتير مش فاهمين أي حاجة، بيهبدوا وخلاص". 

أضافت" خلاص مش لاقيين حاجة تتهمونا بيها، تتهمونا إن إحنا بنشرب وبندخل المكيفات مصر، أنا هتكلم عن نفسي، أنا واحدة من الناس اللي مقدرش أشرب ميه ساقعة ولا دخان من أي نوع، وحسبي الله ونعم الوكيل في اللي يقول ما ليس فينا". 

وتابعت: "اللي يشرب يشرب، هو حر طالما مش بيأذيني، أنت كده اتهمت واحد متوفي وغيره فنانين كتير مالهمش في أي حاجة، اتقِ الله، واللي كاتب إني موقفتش في عزاء أخويا، منك لله يا أخي، الحمد لله، صلتي بكل قرايبي زي الفل، ما بالك أخويا.. الحمد لله، لا عمري طلعت من توبى، ولا عشت الدور، ولا ليا مع حد خصومة، وغصب عني كتبت كده".

استكملت:" لأول مرة، الناس بقت مستفزة جدًا وقليلة أدب، إلا من رحم ربي، إنتم لا تعرفونا ولا تعرفوا إحنا فينا إيه وبنعاني من إيه، حسدتونا وعينيكم جابتنا الأرض، قاعدين تحسبوها لنا، وأراهن أي حد فيكو عنده موهبة كصوت أو كممثل وما يستغلهاش، مش ذنبنا إن إحنا فنانين بالفطرة والموهبة، وإنت قاعد تحسبها لنا". 

واختتمت أمينة حديثها قائلة: "أنت ما تعرفش بندفع إيه قدام ده، منكم لله بجد، معظم الناس حاطة الفنانين دول في فريم إن إحنا تماثيل شمع، مش بنحس ولا عندنا دم، اتقوا الله فينا، كفاية، إنتم ما تعرفوش إحنا فينا إيه، اتقوا الله".