في خطوة جديدة ضمن خطة مصر لاستغلال ثرواتها الطبيعية، بدأت الدولة تنفذ مشروعات مسح جوي حديثة عشان تجذب الاستثمارات الأجنبية.. بس يا ترى ده هيفيد مصر بإيه؟.. وإزاي هيزود العملة الصعبة.
الدولة بدأت مشروعات المسح الجوي علشان نحدد بدقة أماكن وجود المعادن والخامات في الصحرا.
يعني إيه مسح جوي؟ ببساطة، طيارات مزودة بأجهزة متطورة بتمسح مساحات ضخمة من الأراضي، وبتسجل كل حاجة تحت الأرض، من دهب، لنحاس، لفوسفات، وحتى المعادن نادرة، واللي الهدف منه هو إننا نعرف بالظبط إحنا عندنا إيه وفين.. علشان نقدر نستغل الثروات دي بشكل علمي واقتصادي، ونفتح الباب لاستثمارات جديدة في مجال التعدين.
المشروعات دي بتتعمل بالتعاون مع شركات عالمية، وعلماء متخصصين، وبتستخدم تكنولوجيا متقدمة جدًا، علشان نضمن دقة البيانات ونوصل لأفضل النتائج.
كل ده معناه إيه؟
معناه فرص شغل جديدة، دخل قومي أعلى، وبلد بتتحرك بخطوات ثابتة نحو إنها تبقى مركز إقليمي في التعدين.
وخلي بالك، المسح ده مش بس بيدور على الدهب والمعادن الغالية، لأ، ده كمان بيساعد في اكتشاف خامات نادرة ممكن تدخل في صناعات إلكترونية حديثة وأجهزة طبية وغيرها، من الآخر مصر بتخطط صح لمستقبل أغنى وأقوى..
وزير البترول قال تصريح مهم جدًا بخصوص مستقبل التعدين في مصر، واللي أكد أن تحويل هيئة الثروة المعدنية لهيئة اقتصادية، هيديها مرونة وقوة أكتر.. يعني تقدر تعمل أبحاث بشكل أسرع، وتعرض فرص استثمارية مغرية للشركات العالمية، وده هيخلينا نجذب استثمارات ضخمة في مجال التعدين.
الوزير كشف كمان تفاصيل المسح الجوي وقال: فيه شغل بيتعمل دلوقتي على مشروعات مسح جوي وسيزمي، يعني بنمسح الأرض من فوق ومن تحت، علشان نحدد بالضبط إحنا عندنا إيه من معادن وثروات، وده جزء من خطة شاملة لتطوير قطاع التعدين في مصر بشكل كبير.
الوزير كان بيتكلم في لقاء مع لجنة التعدين بغرفة التجارة الأمريكية، وقال إن العالم كله بقى مهتم بالتعدين، وإن مصر مش بس ماشية في الاتجاه ده، لأ، دي بتجري بخطوات سريعة! والدولة بكل مؤسساتها بتدعم القطاع ده علشان نكون في مكانة كبيرة على مستوى العالم.
كمان فيه اهتمام كبير من الحكومة الأمريكية بتطور التعدين في مصر، وفيه تشجيع واضح لشركاتهم إنها تيجي تستثمر عندنا، خصوصًا في المعادن النادرة والمهمة، ومصر فاتحة الباب والفرص كتير، والمستقبل واعد.
إخلاء مسؤولية إن موقع عاجل الإخباري يعمل بطريقة آلية دون تدخل بشري،ولذلك فإن جميع المقالات والاخبار والتعليقات المنشوره في الموقع مسؤولية أصحابها وإداره الموقع لا تتحمل أي مسؤولية أدبية او قانونية عن محتوى الموقع.
