مصر قدامها فرصة حقيقية جديدة لجذب استثمارات أجنبية جديدة للسوق المصري والسبب في ده هو الرسوم الجمركية الأمريكية.. ياتري اية سر الكلام ده. وهل هتكون الرسوم الجمركية الأمريكية هيا السبب الحقيقي في التحول في السوق المصري.
الرئيس الأمريكي دونالد ترامب يرجع يعمل قلق جديد في السوق العالمي بعد ما أعلن عن فرض رسوم جمركية جديدة علي دولتين بيعدوا من أكبر الدول المصدرة للسوق الامريكي وهما البرازيل واللي أكثر من 75% من صادراتها موجه للسوق الأمريكي وكندا واللي الإدارة الأمريكية قررت رفع الرسوم الجمركية الموجودة عليها من 20 الي 35% وده رقم صعب جدا وهيكون له تاثير قوي علي الصادرات الكندية للسوق الأمريكي .
واضح كده أن الإدارة الأمريكية مش هتقف في الرسوم الجمركية اللي هتفرضها علي الدول الي الأرقام دي ولا الدولتين دول، وفي دول تانية كتيرة مرشحة أنها تدخل ضمن الدول اللي هتدفع فاتورة جمركية كبيرة للتصدير للسوق الأمريكي، وده ممكن يكون بارقة أمل جديدة لمصر خصوصا أن العلاقات السياسية بين الولايات المتحدة الأمريكية وأغلب الدول مش في أفضل حالتها وبالتالي متوقع قريب جدا أن الإدارة الأمريكية تعلن قريب قوي علي توقيع رسوم جمركية جديدة علي دول معينة زي الصين واللي مرشحة وبقوة أنها تدخل ضمن قائمة الدول اللي هتخضع لدفع فاتورة جمركية كبيرة في الأيام اللي جاية .
طيب إزاي الدولة المصرية تستفاد من الرسوم الجمركية الأمريكية ؟.
في الفترة اللي فاتت الحكومة قدمت تسهيلات غير مسبوقة لدخول الاستثمارات الاجنبيه للسوق المصري، والتسهيلات دي كانت عبارة عن تسهيلات في إجراءات تخصيص الأراضي اللازمة لبناء واقامة المشروعات والمصانع المختلفة وكمان تسهيلات في إجراءات الحصول علي التراخيص اللازمة للبناء والتشغيل واللي حاليا بقت عبارة عن موافقة واحدة اسمها الرخصة الذهبية واللي بقت كافة للبناء والتشغيل في نفس الوقت.
لازم نعرف كمان أن الرسوم الجمركية دي بتلعب دور مهم جداً، وبتكون سبب اساسي في توجيه المستثمرين لقطاعات معينة داخل الدولة واي مستثمر أجنبي لما بيفكر في دخول سوق جديد بيسأل نفسه هل الأفضل اني أصدر منتجاتي في دول بتفرض رسوم جمركية كبيرة ولا بتقدم تسهيلات كبيرة للمستثمرين خصوصا أن ارتفاع الرسوم على السلع المستوردة بيضاعف التكلفة علي المستهلك وبالتالي حركة البيع بتقل جدا وده بيخلي المستثمرين يبدوا يوجهوا استثماراتهم لاسواق تانية والسوق المصري هيكون في طليعة الأسواق اللي مرشحة لاستقطاب نسبة كبيرة منهم بفضل التسهيلات والتحفيزات الكبيرة اللي يتقدمها الحكومة للمستثمرين.
الفترة اللي فاتت كمان الحكومة المصرية قدمت تسهيلات كتيرة جدا لجذب المستثمرين الأجانب للسوق المصري وبالتالي السوق المصري مرشح وبقوة لاستقبال استثمارات برازيلية جديدة جديدة في الفترة اللي جاية خصوصاً أن مصر دلوقتي عضو في تكتل بريكس وده اللي هنشوف مع حضراتكم الفترة اللي جاية.
إخلاء مسؤولية إن موقع عاجل الإخباري يعمل بطريقة آلية دون تدخل بشري،ولذلك فإن جميع المقالات والاخبار والتعليقات المنشوره في الموقع مسؤولية أصحابها وإداره الموقع لا تتحمل أي مسؤولية أدبية او قانونية عن محتوى الموقع.
