يا ترى إيه اللي ممكن يحصل لما دمياط تتحول لمحور لوجستي عالمي؟، وهو ليه كل الكلام بقى عن "تحيا مصر 1"؟ إيه اللي فيها؟.. وإزاي مشروع واحد ممكن يغير شكل التجارة في الشرق الأوسط؟.. وهل فعلا مصر بتخطط تبقى ترانزيت العالم؟ ولا في مفاجآت تانية؟
الحكومة المصرية ماشية بخطوات ثابتة وناجحة جدا، أنها تقوي الاقتصاد بكل الطرق الممكنة، وده في ضمن خطتها القومية لتطوير المواني وتحويل مصر إلى مركز لوجستي عالمي، وده من أول ما اشتغلت على تنفيذ مشروع إنشاء محطة "تحيا مصر 1"، وده بيعتبر من أضخم مشروعات النقل البحري في المنطقة.
"تحيا مصر1"، من هنا بتتكتب حكاية جديدة في خريطة التجارة العالمية، ولو حد قالك إن في مشروع مصري هيغير شكل الخريطة.. صدقه، وقوله المحطة دي في دمياط، واللي هتكون على مساحة 273 ألف متر مربع، اتحفرت في ميناء دمياط، واللي بتُعتبر واحدة من أكبر المحطات متعددة الأغراض في الشرق الأوسط.. وده مش كلام إعلام، ده كلام أرقام.
وزارة النقل مكملة شغلها على مشروع محطة الحاويات العملاقة "تحيا مصر 1" في ميناء دمياط.. مشروع استراتيجي تقيل، جزء من خطة الدولة لتحويل الموانئ المصرية لمراكز لوجستية عالمية، يعني مصر مش بس بتطور.. دي بتبني مستقبلها بإيديها!
المشروع ده بيشتغل عليه تحالف عالمي ضخم اسمه "دمياط أليانس"، وده بيضم شركات تقيلة من ألمانيا وإيطاليا وأكبر خطوط الشحن في العالم زي "هاباج لويد"، والشركة المسؤولة عن التشغيل بدأت فعلاً تشتغل على البنية الفوقية، يعني التجهيزات اللي فوق الأرض، وده معناه إن المشروع داخل على الجد جدًا!
نيجي بقى للجد، المحطة دي استقبلت لحد دلوقتي 12 ونش رصيف عملاق من الصين من شركة HHMC، واللي تعتبر من أحدث الأوناش في العالم.. الونش الواحد يقدر يشيل 75 طن، وطول دراعه 72 متر، وبيشتغل على ارتفاع يوصل لـ 57.5 متر!.. يعني ببساطة، يقدر يتعامل مع سفن حاويات ضخمة جداً، فيها لحد 11 دور حاويات فوق بعض!
وعشان نكمل الصورة، الأوناش دي مش تقليدية، دي فيها تكنولوجيا ذكية: كاميرات، حساسات، أنظمة أمان، وكله مربوط بأنظمة إدارة الموانئ الذكية، يعني كل حاجة بتتراقب لحظة بلحظة، والتنسيق بين كل عنصر شغال كأنه فريق واحد بيشتغل بأعلى كفاءة.. كمان المحطة ماشية على التحول الأخضر.. استقبلوا 30 ونش ساحة كهربائي (RTG)، من أصل 40، وهيشتغلوا رسميًا في النصف التاني من سنة 2025.
طب كل ده فين؟.. على رصيف طوله 1970 متر، وعمقه 18 متر، ومعاه ساحة ضخمة ورا بمساحة 922 ألف متر مربع، يعني طاقة استيعابية توصل لـ 3.5 مليون حاوية في السنة!
والأقوى من كده؟
المشروع ده جزء من ممر لوجستي متكامل بيربط طنطا، المنصورة، ودمياط.. فيه سكة حديد جديدة، منطقة لوجستية في طنطا، وميناء جاف في دمياط الجديدة، يعني كل الطرق هتؤدي لدمياط، ومنها للعالم كله!.
الخلاصة؟، تحيا مصر 1" مش مجرد محطة، دي نقلة نوعية لمكانة مصر على خريطة التجارة العالمية، وهتحول مصر لمركز إقليمي للنقل والتكامل شغال على كل المحاور: بحري، بري، رقمي، وأخضر كمان.
إخلاء مسؤولية إن موقع عاجل الإخباري يعمل بطريقة آلية دون تدخل بشري،ولذلك فإن جميع المقالات والاخبار والتعليقات المنشوره في الموقع مسؤولية أصحابها وإداره الموقع لا تتحمل أي مسؤولية أدبية او قانونية عن محتوى الموقع.
