هو ليه مصر والسودان بيتعاونوا في مشروع زي ده دلوقتي؟.. وإيه فايدة إن المصنع يبقى في شمال السودان مش جوه مصر؟.. وهو سكر البنجر ده مختلف عن سكر القصب؟.. وإزاي مصنع سكر يقدر يخلق فرص شغل ويقلل الاستيراد؟
فيه مشروع كبير جدًا بيتحضر بين مصر والسودان، وممكن يغير كتير في مستقبل الزراعة والصناعة في البلدين.. واللي هيكون مصنع عملاق لإنتاج سكر البنجر في شمال السودان، قريب من الحدود مع مصر.. الموضوع مش مجرد تعاون عادي.. لأ دي خطوة قوية ناحية "التكامل الاقتصادي" الحقيقي بين بلدين شقيقين، بيجمعهم نيل واحد وتاريخ مشترك.
إيه اللي بيحصل بالظبط؟
الحكومة المصرية دلوقتي بتدرس عرض رسمي من الحكومة السودانية، لإنشاء مصنع ضخم لسكر البنجر في الولاية الشمالية، وده مكان استراتيجي جدًا لأنه قريب من مصر، يعني في سهولة في النقل والتبادل التجاري بين البلدين، وفيه ناس بتعتبره رد جميل من السودان لمصر عشان ضيافتنا للأخوة السودانيين في مصر.. والمفاجأة إن شركة السكر والصناعات التكاملية المصرية هي اللي بتقود الموضوع
المهندس صلاح فتحي، العضو المنتدب التنفيذي في الشركة، قال إنهم شغالين دلوقتي على إعداد التصميمات الفنية والهندسية للمصنع، عشان أول ما يحصل الاتفاق النهائي بين الحكومتين، يبتدوا في التنفيذ على طول.
طب المشروع ده هيكلف كام؟
التكلفة الاستثمارية للمصنع تقريبًا 350 مليون دولار، يعني مشروع تقيل ومحترم، وطاقته الإنتاجية المبدئية حوالي 12 ألف طن سكر في اليوم، وده رقم كبير جدًا، يخلي المصنع من أكبر مصانع السكر في المنطقة.. ومن المتوقع إن الدراسات وكل التحضيرات تخلص خلال شهرين أو 3 شهور، وبعدها يبدأ التنفيذ الفعلي بإذن الله.
طب هيزرعوا إيه؟ وهيشتغل إزاي؟
المصنع هيعتمد بشكل أساسي على بنجر السكر كمادة خام، وده اختيار ذكي جدًا، لأن الأراضي في شمال السودان صالحة جدًا للزراعة، والمياه هناك متوفرة، فالمكان مثالي لزراعة البنجر.
مش كده وبس، ده كمان هيكون فيه وحدة زراعية متكاملة تبع المصنع، عشان تضمن إن الإنتاج يفضل مستمر، والمصنع يشتغل بأعلى كفاءة، وكمان يزود القيمة المضافة للمحصول بدل ما يتصدر خام.
يعني إحنا مستفيدين إزاي؟
المشروع ده مش بس مفيد للسودان، ده مفيد لمصر كمان، لأنه أولا هيقوي الشراكة الاقتصادية بين البلدين، وهيقلل من الاعتماد على استيراد السكر من بره، ده غير أنه هيوفر فرص شغل كتير جدًا للسودانيين، سواء شغل مباشر جوه المصنع، أو غير مباشر في الزراعة، والنقل، والتجارة..وهيساهم في تحقيق الأمن الغذائي في المنطقة، وده هدف كبير جدًا في ظل الأزمات العالمية اللي بنشوفها حوالينا.
المشروع كمان بييجي ضمن اتفاقيات التعاون الاقتصادي اللي اتفعلت بين مصر والسودان في السنين اللي فاتت، وخصوصًا في مجالات الزراعة، والصناعة، والطاقة، والنقل.. يعني مش مشروع منفصل.. لأ، ده حلقة من سلسلة طويلة ماشية في اتجاه دعم التعاون الحقيقي بين البلدين.
الخلاصة؟، إحنا قدام مشروع إنتاجي ضخم، بين بلدين إخوات، هيستفيد منه المزارع، والعامل، والمستهلك.. وخطوة تانية مهمة في طريق التنمية المستدامة، وتحقيق تكامل اقتصادي عربي-أفريقي حقيقي.
إخلاء مسؤولية إن موقع عاجل الإخباري يعمل بطريقة آلية دون تدخل بشري،ولذلك فإن جميع المقالات والاخبار والتعليقات المنشوره في الموقع مسؤولية أصحابها وإداره الموقع لا تتحمل أي مسؤولية أدبية او قانونية عن محتوى الموقع.
