الاقتصاد المصري بيرجع يطلع على السطح من تاني، بس يا ترى النمو اللي بنسمع عنه ده معناه إيه لينا كمواطنين، وهل الأرقام دي فعلا بتحسها الناس؟
في الحقيقة، في توقعات ظهرت من خبراء الاقتصاد اللي شاركوا في استطلاع عملته وكالة رويترز، وقالوا إن الاقتصاد المصري مرشح يحقق نمو بنسبة 4.6% خلال السنة المالية الحالية، وده رقم أعلى من اللي كان متوقع قبل كده، واللي كان حوالي 3.8%.
طيب إيه اللي ساعد على القفزة دي؟
اللي حصل إن مصر سرعت خطوات الإصلاح الاقتصادي، خاصة بعد اتفاقها مع صندوق النقد الدولي على برنامج ب8 مليار دولار، وكمان ضخ استثمارات ضخمة من الإمارات وصلت ل 24 مليار دولار، أغلبها في مشروعات على سواحل البحر المتوسط.
كمان، النشاط الصناعي ابتدى يتحسن، والربع الثالث من السنة الحالية سجل أعلى معدل نمو فصلي بقاله 3 سنين، ووصل ل 4.77%، وده مؤشر إن العجلة بتتحرك فعلا، بس هل ده معناه إن الدنيا بقت وردي؟
بصراحة، مش بالضرورة، لأن لسه في تحديات، زي مثلا التضخم اللي نزل بس بردو لسه عالي، ولسه الجنيه مضظرب قدام الدولار، يعني ببساطة الاقتصاد بيتحرك في الاتجاه الصح، بس لسه المشوار طويل.
وإيه اللي ممكن ننتظره؟
أسعار الفايدة ممكن تنزل تدريجيا، وده معناه إن ممكن نسمع عن شهادات بعائد أقل شوية خلال الشهور الجاية، وكمان الاستثمارات الخاصة هتزيد، وده معناه فرص شغل أكتر وتحرك في السوق، وبردو التضخم ممكن يهدى تدريجيا، بس لسه محتاج وقت عشان الناس تحس فعليا بانخفاض الأسعار.
والخلاصة، هي إن الاقتصاد المصري بدأ يتعافى فعلا، بس الأرقام بتقول كتير، لكن الأهم هو إحساس الناس، وكل ما الإصلاحات استمرت، وكل ما السياسات فضلت متوازنة، كل ما كانت فرصة إن التحسن ده يوصل لجيب المواطن أكبر.
عشان كده، متوقع ان الفترة الجاية يحصل انخفاض في معدلات التضخم وزيادة في النمو الاقتصادي واللي هيأثر بشكل إيجابي وكبير على حياتنا وهيخلي الاقتصاد ياخد نفسه شوية، عشان نأكد اننا ماشين صح في خطة الإصلاح الاقتصادي.
إخلاء مسؤولية إن موقع عاجل الإخباري يعمل بطريقة آلية دون تدخل بشري،ولذلك فإن جميع المقالات والاخبار والتعليقات المنشوره في الموقع مسؤولية أصحابها وإداره الموقع لا تتحمل أي مسؤولية أدبية او قانونية عن محتوى الموقع.
