على غرار المنطقة الاقتصادية لقناة السويس، الدولة بتعمل منطقة صناعية في جرجوب.. ياتري اية حكاية المنطقة دي.. والاستثمارات المتوقعة فيها هتوصل لكام.. وآية فائدتها للاقتصاد المصري.
الدولة الفترة دي بتتحرك بخطوات كبيرة في موضوع إنشاء مناطق اقتصادية خاصة، وآخر حاجة صدر بيها قرار جمهوري هي منطقة جرجوب، ودي منطقة موجودة في الساحل الشمالي الغربي، على مساحة ضخمة جدا بتوصل لحوالي ٤٠٢ ألف فدان، ودي مساحة تخليك تتكلم عن مدينة متكاملة مش مجرد مشروع.
الخطة اللي شغالة عليها الدولة هدفها تحويل المنطقة أنها تبقي منطقة اقتصادية لها طبيعة خاصة، يعني ليها قوانين مميزة بتسهل على المستثمرين زي تقديم إعفاءات ضريبية، وتسهيل إجراءات الترخيص، وده بيخليها جاذبة للاستثمارات الأجنبية والمحلية.
الميزة كمان اللي موجودة في منطقة جرجوب الاقتصادية هيا أنها فيها ميناء خاص وهو ميناء جرجوب البحري اللي الدولة ناوية تطوره، وده هيخليها مركز مهم للتجارة البحرية، وفي ربك بينها بين دول قارات أوروبا وأفريقيا وآسيا.
طيب اية التأثير اللي هيرجع علي الاقتصاد المصري من خطة التوسع في المناطق الاقتصادية اللي زي جرجوب ؟.
مصر في الوقت الحالي عندها هدف وخطة للتوسع في المناطق الاقتصادية وعاملة تعمل مدن اقتصادية كبيرة زي اللي حصل في المنطقة الاقتصادية لقناة السويس، خصوصا ان النوعية دي من المدن لها اكثر من هدف أولهم انها بتكون بوابة جديدة للاستثمارات الأجنبية في السوق المصري، خصوصا أن المناطق الاقتصادية بتوفر بنية تحتية كبيرة للمستثمرين، وكمان بتكون فيها مؤاني بحرية يعني هتكون في حرية وراحة كبيرة في عمليات الاستيراد والتصدير.
تاني حاجة هتسفاد منها مصر من المناطق الاقتصادية زي منطقة جرجوب هيا أنها بتوفر عدد كبير من فرص العمل للشباب في مصر سواء في مرحلة الإنشاء أو بعد ما المشروعات الصناعية والسياحية تبدأ تشتغل، ده غير أنها بعد ما تجهز هتوفر عدد من فرص العمل للشباب في المجالات الصناعية اللي هتكون فيها، ده غير فرص العمل اللي هتوفرها المنطقة للشباب بطريقة غير مباشرة زي السواقين والمصانع اللي هتصنع الحديد ومواد البناء والعمال اللي هتشتغل في المشروع، وده كله خير علي مصر.
المشروع كمان هتضيف كمان نهضة سياحية كبيرة للساحل الشمالي الغربي اللي طول عمره مهمل شوية مقارنة بمناطق تانية، وبالتالي احنا حولنا مناطق مكانتش معرفة الي مناطق ذات دخل وناتج كبير في الناتج القومي، خصوصا أن المنطقة دي بالذات موجودة على البحر المتوسط وجاذبة لأي مشاريع فندقية وسياحية عالمية.
في هدف كمان هيرجع علي مصر من المنطقة الاقتصادية في جرجوب وهيا زيادة الصادرات المصرية لكل دول العالم، وهتقرب مصر خطوة جديدة من تحقيق حلم الوصول لتحقيق 140 مليار دولار في 2030، ده غير أن المصانع اللي هتكون موجودة في المنطقة هتوفر علي مصر صناعات كتيرة بيحتاجها السوق المصري وده هيكون بديل لمصر لتوفير رقم كبير من فاتورة الاستيراد الخارجي.
إخلاء مسؤولية إن موقع عاجل الإخباري يعمل بطريقة آلية دون تدخل بشري،ولذلك فإن جميع المقالات والاخبار والتعليقات المنشوره في الموقع مسؤولية أصحابها وإداره الموقع لا تتحمل أي مسؤولية أدبية او قانونية عن محتوى الموقع.
