ظهرت الفنانة عبير عادل، في برنامج "أنا غير" مع مجدلا خطار عبر قناة "المشهد"، بعد فترة طويلة من الغياب عن الساحة الفنية للحديث عن قلة الأعمال المعروضة عليها مما دفعها للعمل على سيارتها كسائقة في أحد تطبيقات التوصيل.
أبرز تصريحات عبير عادل
وقالت عبير عادل: "الشغل شرف لأي إنسان ممكن يكون في متغيرات في حياته في الظروف المحيطة، مفيش شغل كانت الوسيلة اللي قدامي إني استخدم العربية علشان اشتغل، من ممثلة لسائقة توصيل، رد فعل الناس اتبنى عليه رد فعلي مكنتش متخيلة أن رد الفعل هيبقى بالشكل الإيجابي السريع أنا انبسطت من رد فعل الناس لأنهم شجعوني مكنتش متخيلة دا".
وتابعت عبير عادل: "بقالي 7 سنين غايبة عن الفن ومش بإرادتي السوق عرض وطلب مش بطلب، في الفن تتوقع أي حاجة لأن هي لعبة أنتي مش عارفة الدور بتاعك هيخلص أمتى بتبقى حاجة مؤثرة طبعًا في اللي بيحب اللعبة دي لما بيطلع برا الملعب بتاعة أكيد زعلانة ونفسي أنزل اشتغل تاني لكن وجدت البدائل عشان الحياة تستمر".
وأضافت عبير عادل: "لما لقيت الفترة طولت والاحتياجات والمتطلبات بتزيد دا طبيعي كان لازم أدور على بديل، في أول يوم وأنا بشتغل كنت خايفة لأن كل شغلانة ليها تفاصيلها وأدواتها ومكنتش عارفة أي حاجة بس اتعودت وبقيت عارفة، أول راكب كانت واحدة ست ووديتها منطقة كانت شعبية وبعد ما نزلت مبقتش عارفة أطلع من المنطقة إزاي وبقيت اسأل الناس وبعدها جالي طلب تاني من ست كانت لطيفة، الأولانة مرضيتش تقعد جنبي وقعدت ورا ومكنتش بتتكلم معايا وأنا أصلا مخضوضة وتجربة جديدة وهي زودتلي التوتر، التانية كانت ست لذيذة وقعدت تتكلم معايا ووصلتها المشوار بتاعها معرفتنيش لأنها مكانتش مصرية".
ابنه الوزير في مسلسل “لن أعيش في جلباب أبي”
قدمت الفنانة عبير عادل أشهر أعمالها في الدراما المصرية من خلال مشاركتها في مسلسل “لن أعيش في جلباب أبي”، حيث قدمت " دور ابنة الوزير (رشوان توفيق)، وشقيقة ياسر جلال في المسلسل، وحققت نجاحًا باهرًا جماهيريًا وفنيًا، وشاركت به مجموعة كبيرة من الفنانين: نور الشريف وعبلة كامل، عبد الرحمن أبو زهرة، محمد رياض، وغيرهم، إخراج أحمد توفيق، عن رواية للكاتب إحسان عبد القدوس، سيناريو وحوار مصطفى محرم.
