رصدت بانكير، خلال الساعات الأخيرة، عدد من الملفات على الساحة المحلية والعالمية، التي تم نشرها عبر منصاتها المختلفة، والتي يأتي من أبرزها، 3 دول كبرى مهتمة بالاستثمار في مصر، واجتماع مهم مع شنايدر، وانخفاض مفاجيء للدهب.
ونبدأ بخبر مهم.. رئيس غرفة الصناعات الكيماوية باتحاد الصناعات.. شريف الجبلي.. قال إن مصر جالها طلبات من شركات صينية وهندية وتركية عشان ينفذوا مشاريع كبيرة في قطاع الأسمدة.
الجبلي ضاف إن الطلبات الأجنبية دي بتستنى موافقة الحكومة المصرية عشان تبدأ تتنفذ.. وقال إن فيه اهتمام كبير من المستثمرين الأجانب بالسوق المصري.. وبالتحديد في قطاعي الأسمدة والكيماويات.. وده بسبب وجود المواد الخام.. وكمان انخفاض تكاليف الإنتاج.
إنتاج مصر من الأسمدة حوالي 12 مليون طن.. منهم 8 مليون طن أسمدة نيتروجينية.. و4 مليون طن فوسفاتية.. وده حسب بيانات سابقة لوزارة قطاع الأعمال في مصر.
الجبلي أشار إلى إن السوق المصري فيه طلب كبير ومتزايد على الأسمدة.. خصوصاً مع خطة الدولة إنها تزود الرقعة الزراعية في الخمس سنين اللي جايين.. ده غير الاتفاقيات التجارية الكويسة اللي بتربط مصر بدول العالم المختلفة.. واللي بتخلي صادرات القطاع ده تدخل بجمارك مناسبة.
مصر بتسعى إنها تزود الرقعة الزراعية لـ 13.5 مليون فدان في التلات سنين اللي جايين.. وده حسب تصريحات جديدة لوزير الزراعة واستصلاح الأراضي.. علاء فاروق.. اللي قال إن بلاده نجحت إنها تزود الأراضي المزروعة من 8 مليون فدان في 2011.. لـ 9.5 مليون فدان دلوقتي.
ونروح لوزارة الكهرباء.. الدكتور محمود عصمت.. وزير الكهرباء والطاقة المتجددة.. اجتمع مع سيباستيان رييز.. الرئيس الإقليمي لشركة شنايدر إليكتريك.. عشان يتناقشوا في مستجدات مبادرة تحسين كفاءة استخدام الطاقة في المصانع.. المبادرة دي بدأت رسميًا في شهر مايو اللي فات.. وهدفها إنها تقدم نموذج عملي لمراجعة استخدامات الطاقة في عدد من المصانع.. عشان يتم تطبيق التجربة على كل القطاعات الصناعية في مصر.
المبادرة دي كان فيها خطة عشان يتم مراجعة الطاقة في 25 مصنع.. تم اختيارهم عشان يوضحوا الاستخدامات المختلفة للكهرباء.. المصانع دي بتضم قطاعات زي الأسمنت.. والألومنيوم.. والغزل والنسيج.. والزجاج.. والغاز الطبيعي المسال.. والصناعات الغذائية والمشروبات.
الاجتماع اتكلم كمان عن خطة التعاون عشان يتم تدريب مهندسي وزارة الكهرباء والشركة القابضة لكهرباء مصر على إجراءات مراجعة الطاقة في المصانع.. كجزء من برنامج بناء القدرات الفنية عشان يضمنوا استدامة المبادرة.. الوزير استعرض الجهود اللي وصلت لإنهاء مراجعات الطاقة في 13 مصنع لحد دلوقتي.. وأكد على أهمية إن كل أعمال المراجعة تخلص قبل نهاية شهر سبتمبر.
ونروح لسوق الصاغة.. سعر الدهب في مصر نزل النهاردة.. للمرة التانية.. بمتوسط 8 جنيهات في كل الأعيرة.. ووصل سعر عيار 21 لـ 4850 جنيه للشراء.
وجاءت أسعار الدهب في مصر كالتالي:
سعر الدهب عيار 24: 5542 جنيهًا
سعر الدهب عيار 21: 4850 جنيهًا
سعر الدهب عيار 18: 4157 جنيهًا
سعر الجنيه الدهب: 38800 جنيهًا
وكانت أسعار الدهب ارتفعت بشكل ملحوظ في تعاملات الأسواق المحلية والبورصة العالمية.. مع زيادة توقعات المستثمرين إن مجلس الاحتياطي الفيدرالي الأمريكي هيخفض أسعار الفايدة في اجتماعه اللي جاي الشهر ده.
مجلس الاحتياطي الفيدرالي الأمريكي أعلن من فترة إنه ثبت سعر الفايدة الرئيسي.. عند 4.25٪ و4.50٪.. وده كان خامس اجتماع ليه السنة دي.. وهو خامس اجتماع من غير تغيير في أسعار الفايدة من أول ما الرئيس الأمريكي دونالد ترامب بدأ مهامه في بداية 2025.
ونروح للمهندس كريم بدوي.. وزير البترول والثروة المعدنية.. اللي أكد على أهمية عمليات المسح السيزمي.. اللي تعتبر من أهم الحاجات اللي بتجذب الشركات اللي عايزة تشتغل في البترول والغاز في مصر.. لإنها بتوفر بيانات كافية عن الآبار البترولية.. وده بيشجع الشركات دي إنها تستثمر في البحث والاستكشاف.
الوزير حرص إنه يوجه رسالة شكر وتقدير لمجهودات العاملين في قطاع البترول.. اللي ساهموا في تجهيز التسهيلات الأرضية في الموانئ عشان يستقبلوا ويرسوا سفن تسييل الغاز.. أو يعملوا تعديلات على السفن.. أو يوفروا شحنات الغاز المسال الضرورية عشان يفضلوا يوفروا احتياجات المواطنين.. خصوصًا في الصيف.. وأكد إن قطاع البترول نجح إنه يوفر حوالي 3.5 مليار دولار من فاتورة الاستيراد لمصر.
الوزير شدد على إن الإجراءات دي.. رغم أهميتها.. هي خطة استثنائية عشان يأمنوا الإمدادات.. وإن الهدف الأساسي هو زيادة الإنتاج المحلي من خلال تكثيف عمليات البحث والاستكشاف.. وتحقيق الاكتشافات.. وشدد كمان على أهمية إن شركات توصيل الغاز للبيوت والمصانع تنسق مع كل الأجهزة اللي ليها علاقة.. عشان يتأكدوا إن إجراءات السلامة والأمان مستمرة خلال عمليات التوصيل.
إخلاء مسؤولية إن موقع عاجل الإخباري يعمل بطريقة آلية دون تدخل بشري،ولذلك فإن جميع المقالات والاخبار والتعليقات المنشوره في الموقع مسؤولية أصحابها وإداره الموقع لا تتحمل أي مسؤولية أدبية او قانونية عن محتوى الموقع.
