عقد الكابتن محمود الخطيب رئيس النادي الأهلي، جلسة مع لاعبي الفريق الأول لكرة القدم بالنادي، من أجل دعمهم، والحث على ضرورة تحقيق الفوز في المباريات الخمس القادمة، قبل فترة التوقف الدولي القادمة.
تصريحات محمود الخطيب
قال محمود الخطيب: “الكابتن وليد والكابتن عماد وكل الطاقم الموجود، هما اخواتكم، هما المسئولين مسئولية كاملة عن كل ما يخص الفريق الأول”.
وتابع في جلسته مع لاعبي الأهلي: "عايز اتكلم معاكم، كورة، الكرة مش أسماء، الكرة جدعنة ورجولة، وسبرينتات واحتكاك، الكرة مش أسماء أبدا، خدوا بالكم، احنا في استاد مختار التتش "رحمة الله عليه" أحد الاساطير، مرورًا بوجود سيادتكم وكلهم كانوا أحسن منا، كله راح وأنتم دلوقتي وجهة النادي".
وأضاف: "كلنا بنزول، والأهلي اللي باقي، وإن شاء الله سيبقى، اللي صنع الإسم دا مين "الأهلي"، والأهلي بيصنع أسماء كل يوم، مينفعش الناس تلعب بأسمائها، الناس تلعب بمجهودها وتكون رجالة".
وأكمل: “الفترة اللي فاتت، مكنتش أحب أبدا تكون موجودة معاكم أنتم، الأهلي كيان، الأهلي تاريخ، الأهلي مبادئ، الأهلي قيم، والأهلي هيبقى ويستمر كدا”.
اجتماع الخطيب مع لاعبي الأهلي
وواصل: “الأهلي هيذكر اللي هيمشي على نفس الخط بتاعه، لازم نفكر يا رجالة في الكلام دا، احنا النهاردة ناويين نقدم إيه ونعمل إيه، وأنا اتكلمت معاكم قبل كدا”.
وأكد: “واضح إن احنا نسينا، إزاي تقدروا جماهير الأهلي وتحترموا كيان النادي، هو دا المطلوب منكم، النادي الأهلي بيصبر لكن مبيقبلش أي حاجة غير اللي هيساهم في رفع اسم كيان هذا النادي، دا اللي احنا هنقبله بس”.
وزاد: “أنا عندي ثقة كبيرة في كل واحد فيكم، ننسى الفترة اللي فاتت، نشطب عليها، ونشوف اللي جاي إيه، وأنا متأكد يا رجالة، لو التركيز زاد، الموضوع إن شاء الله تحققوا كل اللي تتمنوه، واللي الجماهير تتمناه”.
وأتم الخطيب حديثه: “حافظوا على تاريخكم تاريخ ناديكم، نقدر جماهيرنا ونحترمهم، وإن شاء الله كلنا نمد إيدينا ونقرأ الفاتحة”.
