أكد الإعلامي مصطفى بكري أن الموقف المصري من تهجير الفلسطينيين ثابت، مشيرا إلى أن وزارة الخارجية شددت في بيانها الأخير على هذا الموقف.
وقال بكري خلال برنامج "حقائق وأسرار" المذاع على قناة "صدى البلد": "هو ده الموقف أنا ما بخاطبش الخونة ولا ببرر مواقفنا ولا بقول للمتآمرين هو ده مواقفنا لا احنا ما يهمناش حد احنا بنقول ده مواقفنا وثوابتنا الأساسية زي ما قالت الخارجية المصرية ده هيفضل خط أحمر غير قابل للتغير قرار نهائي".
وأضاف: "وإذا إسرائيل عملتها هتشوف رد مصر لا تتوقعوه إذا فكرت أنت أو غيرك تدفع الفلسطينيين وتفتح المعبر من ناحيتك وتزق بيهم والله ستدفع إسرائيل ثمنا غاليا وأنا بقول كلام من عندي ومن الدماغ دي وهتشوفوا ده كويس قوي لأن مصر لن تسمح بتهديد أمنها القومي وحذرت وقالت ده خط أحمر واللي هيتحمل المسؤولية إسرائيل".
وتابع: "أولا مصر طالبت في البيان ده بعده مطالب واضحة أول حاجة مواجهة حالة الفوضى التي تسعى إسرائيل لتكريسها في المنطقة. اثنين وقف إطلاق النار في غزة وانسحاب إسرائيل من القطاع. ثلاثة توفير الدعم الدولي لتمكين السلطة الفلسطينية الشرعية من العودة لغزه وده حقها. أربعة إعادة تشغيل المعبر وفقا للاتفاقات الدولية بما فيها يعني معبر رفح اللي بتحكمه اتفاقية العبور والنفاذ اللي توقعت سنه 2005".
وأكمل: "مصر قالت كمان إن تجسيد حلم الدولة الفلسطينية على الخطوط الرابع من يونيو لعام 67 وعاصمتها القدس الشرقية هو الخيار الحتمي اللي هيفرض نفسه عاجلا أم أجلا لأنه ده متسق مع حق تقرير المصير مع حق الإنسان مع المنطق الإنساني مع جميع القرارات الدولية ذات الصلة".
واختتم: "ده بيان مصر وده موقفها عشان كده كانت تصريحات نتنياهو ورد الخارجية الحاسم والقاطع أمر مفروغ منه".
