الشمس والهواء بقوا مصدر مهم من مصادر الدخل الدولاري لمصر من الخارج.. ياتري اية حقيقة الكلام ده .. وهل مصر هتاجر في الهواء ولا اية .. وهل في دول بتشتري الشمس والهواء.
قرأنا في كتب التاريخ أنه ربنا عطي لمصر إمكانيات طبيعية مفيش زيها في العالم جزء معتدل صيفيا ودافئ شتاءا... لكن عمرنا ما فكرنا في معزي الكلمة دي.. خصوصا اننا وبشكل عفوي اتعودنا علي الجو في مصر ولا كان بيفرق معانا نفكر ازاي نستغل الاعتدال المناخي ده في فتح مصدر دخل دولاري لمصر من الخارج.
بعد سنين طويلة والتطور العلمي اللي دخل والاستعانة بالتكنولوجيا الحديثة.. تحولت الشمس والهواء لواحد من أهم مصادر الدولار في العالم كله .. وده حصل بسبب اتجاه اغلب دول العالم للاعتماد عليهم في توليد الكهرباء واللي هيا عصب اي اقتصاد في العالم.. واللي بدونهم مفيش دولة مش هتقف علي رجلها.
طيب إزاي مصر هتستفاد من الشمس والهواء في فتح مصدر دخل دولاري؟.
الثورة الكبيرة اللي قامت بيها القيادة السياسية في أعادة بناء بنية تحتية قوية لمصر.. بند مهم منها هو إعادة بناء مصادر الطاقة ومحطات توليد الطاقة الكهربائية خصوصا.. وده لأكثر من سبب أولهم تحقيق رفاهية الشعب المصري وأنه يضمن أنه هيعيش في جو مستقر مفيش قطع كهرباء.. ولا هيكون فيه الكلام اللي كانت الجماعات اياها بتردده لما كانوا بيأخذوا فيديوهات للكهرباء المقطوعة علي الناس في البيوت ويقولوا مصر منورة بأهلها .
تاني هدف من أهداف الحكومة من إعادة بناء البنية التحتية لمصر من محطات توليد الكهرباء .. هيا خدمة اهداف الاستثمار والصناعة .. خصوصا أن أي صناعة في العالم أول نقطة بتعتمد عليها هيا قطاع الطاقة .. وده لسبب بسيط جدا أنه مفيش مستثمر هينزل علي دول يرمي ملايين الدولارات في مشروع هو مش ضامن يشغله بسبب أزمة الطاقة .. وعلشان كده الحكومة عملت ثورة كبيرة علي لإعادة بناء محطات الطاقة في مصر.
مع مرور الوقت الحكومة صاغت استراتيجية وطنية للطاقة.. واحد من البنود المهمة اللي موجودة في الاستراتيجية هيا زيادة مساهمة الطاقة المتجددة في الاستهلاك المحلي الي 42% في 2030 وزيادتها الي 65% في 2040 ..والنوع ده من الطاقة بيتعمد علي الشمس والهواء.. والدول بتستفاد من الشمس في توليد الكهرباء عن طريق الواح الطاقة الشمسية.. ومن الهواء بتولد الكهرباء عن طريق محطات الرياح..
ومصر عندها عدد كبير من المناطق اللي نقدر نستفيد منها في توليد الكهرباء من المصدرين دول زي الزعفرانة وخليج السويس ودول الدولة مركزة عليهم في بناء محطات الرياح.. وأسوان الدولة مركزة عليها في بناء محطات الطاقة الشمسية زي محطة بنبان.
الطاقة المتجددة اللي مصر هتنتجها من الشمس والرياح مصر هتدخلها خلال وقت قريب قوي في التصدير للخارج عن طريق خطوط الربط الكهربائي اللي موجود حاليا في عدد كبير من الدول في آسيا وأفريقيا وأوروبا.
إخلاء مسؤولية إن موقع عاجل الإخباري يعمل بطريقة آلية دون تدخل بشري،ولذلك فإن جميع المقالات والاخبار والتعليقات المنشوره في الموقع مسؤولية أصحابها وإداره الموقع لا تتحمل أي مسؤولية أدبية او قانونية عن محتوى الموقع.
