أشاد المخرج محمد سامي، بموهبة الفنانة منى زكي من خلال منشور عبر حسابه الرسمي بموقع “فيس بوك”، حيث وصفها بأنها النجمة الأهم والموهبة الأكبر.
محمد سامي عن منى زكي: مثقفة متعلمة راقية متطورة
وكتب محمد سامي عبر حسابه الرسمي بموقع “فيس بوك”: "ليه منى زكي؟ كنت بتكلم مع منى زكي بسلم عليها وقعدت أتكلم معاها شوية، وأدخل من موضوع لموضوع وبعد ما قفلت سألت نفسي أكثر من سؤال، ليه منى زكي فارقة كتير؟، ليه عندها بريق من نوع خاص، ليه هي النجمة الأهم والموهبة الأكبر، ليه هي سابقة جيلها بفرق كبير جدا رغم إن جيلها قوي وفيه زميلات نجوم حقيقيين على جميع المستويات وموهوبين وناجحين وقدموا أعمالا مهمة ولكن محدش وصل لأنه يبقى منى زكي، ليه فضلت من أول يوم ليها كممثلة لحد النهاردة أيقونة يصعب تكرارها أو القرب من حجم اسمها ومكانتها على المستوى الفني أو على مستوى النجومية والموهبة أو حب الجمهور".
وأضاف محمد سامي: ""ليه منى زكي أكثر ممثلة تصدقها وتتوحد معاها، ليه لو فكرت في ممثلة تلاقي صورة منى زكي هي أول صورة تيجي في بالك، بإختصار لأن منى زكي مثقفة متعلمة راقية متطورة مش بتمثل وخلاص ولا بتظهر وخلاص ولا بتتكلم وخلاص ولا مهتمة بتفاصيل الناس الفاضية، ست كلامها مرتب وأسألتها ليها معنى وهدف وأنا بتكلم معاها ما بلاقيش لحظة من النقاش دخل في جدل بلا هدف أو كلام من أجل الكلام وخلاص".
واختتم محمد سامي منشوره قائلًا: "الست دي وهي بتتكلم عن الفن تحب تسمعها ولما توصف الفن تفرح إنك تنتمي ليه من طريقة كلامها عنه، لما تناقش معاها أي موضوع تلاقي وعي وحكمة وتحضر وثقافة، ست ناجحة وزوجة وأم ناجحة، لما تتفرج على أي مشهد ليها بتلاقيها خلته مش عادي، بتشوف تحضير ومذاكرة ورؤية ومجهود واضح وعلام وعقل مترتب وده بيبان في أصغر التفاصيل، بتقدم أي مشهد صعب ببساطة وشياكة من غير تصنع أو تشتيت، طريقتها في النقد شيك وتبسيطها لصعوبة أدوار عملتها بيدل على ثقتها في نفسها اللي بلا حدود، حتى لما نبص للقائتها أو لدورها في المجتمع أو كلامها في ندواتها حتى في الإعلانات اللي قدمتها أو أفلامها ومسلسلاتها أو لبسها في أي ظهور ليها حتى لو مش رسمي هتلاقيها بتعرف تنتقي وهتلاقي دايما في جودة ورمز مشرف للست المصرية".
