يا ترى الكشف الجديد في "شمال لوتس العميق" مجرد بداية ولا الصحراء الغربية لسه مخبية مفاجآت تانية؟، وهل ممكن نلاقي اكتشافات تتفوق على حقل "ظُهر" اللي غير خريطة الغاز في مصر والمنطقة؟، وهل ممكن نوصل لمرحلة نصدر فيها أكتر ما نستهلك من البترول الخام والغاز؟
النهاردة وزارة البترول أعلنت عن كشف جديد في الصحراء الغربية، الكشف ده في البئر الاستكشافي شمال لوتس العميق-1 اللي تبع شركة عجيبة للبترول، باستثمارات من شركة إيني الإيطالية.
الكشف ده لوحده بيدي 1835 برميل بترول خام يوميًا، ومعاهم 7 مليون قدم مكعب غاز، يعني ما يعادل حوالي 3100 برميل مكافئ، والأهم إنه خلاص دخل فعليًا على خريطة الإنتاج، واحتياطياته بتتقدر بحوالي 5 مليون برميل مكافئ.
وده مش مجرد كشف عادي، ده بيأكد إن الصحراء الغربية لسه مليانة أسرار وفرص بترولية وغازية، وإنها منطقة جاذبة جدًا للاستثمارات.. واللي يزود قيمة الكشف الجديد إن قبلها شركة عجيبة وإيني نجحوا في قصة تانية مثيرة في حقل شمال روزا، لما قدروا يوصلوا لطبقة "المساجد العميقة" على عمق أكتر من 11 ألف قدم، والطبقة دي كان إنتاجها ضعيف جدًا بالطرق التقليدية، لكن بالتكنولوجيا الجديدة للحفر الأفقي الإنتاجية زادت 6 أضعاف! يعني بقوا يطلعوا حوالي 7 مليون قدم مكعب غاز يوميًا ومعاهم 550 برميل زيت مكافئ، إنجاز فعلي بيغير قواعد اللعبة في الصحراء الغربية.
وزير البترول بنفسه علّق وقال إن ده دليل على قدرة الشركات إنها توظّف أحدث تقنيات الحفر علشان تفتح إمكانات جديدة وتخلي الصحراء الغربية واحدة من أكتر المناطق الواعدة للاستثمار والإنتاج.
كمان رئيس شركة عجيبة أوضح إن استثمارات السنة دي وصلت لـ 404 مليون دولار، والإنتاج مستقر بمتوسط أكتر من 26 ألف برميل زيت خام يوميًا، ومعاهم حوالي 77 مليون قدم مكعب غاز، يعني إجمالي بيقرب من 40 ألف برميل زيت مكافئ يوميًا، ده غير إنهم حفروا 28 بئر إنتاجي وكمان بئرين استكشافيين، وبدأوا يشغلوا محطة جديدة لإعادة معالجة وضخ المياه المصاحبة في الخزانات اللي شغالة، ودي خطوة بيئية محترمة جدًا.
مش بس وكده، شركة إيني الإيطالية أكدت إنها شايفة إن الصحراء الغربية عندها إمكانات كبيرة جدًا، وإن التجربة الناجحة في طبقة "المساجد" هتفتح الباب لقصص نجاح أكبر الفترة الجاية.
واللي لازم نفتكره إن ده مجرد أحدث كشف في سلسلة طويلة… يعني قبلها شفنا اكتشافات ضخمة زي بئر GPR-1X في أبو سنان اللي أضاف لوحده حوالي 2 مليون برميل للاحتياطي، وشركة خالدة اللي أعلنت عن اكتشافات بـ 12 مليون برميل مكافئ، غير إنهم شغالين على بئر تاني ممكن يضيف 12.5 مليون برميل نفط مكافئ تاني!
واللي بيأكد أن مصر النهارده بقت لاعب مهم جدًا في سوق الطاقة، أن احنا عندنا احتياطيات مؤكدة من النفط حوالي 3.3 مليار برميل، وبننتج تقريبًا 550 ألف برميل يوميًا، أما الغاز الطبيعي فمصر مخزونه المؤكد بيوصل لـ 2.2 تريليون متر مكعب، والإنتاج اليومي حوالى 180 مليون متر مكعب.
لكن اللافت للنظر إن الصحراء الغربية لوحدها بقت ورقة رابحة جدًا، المنطقة دي مسؤولة عن 32 لـ 37% من إنتاج مصر النفطي والغازي، ومن يوليو 2024 لحد مايو 2025 بس، اتعمل 40 اكتشاف جديد، منهم 29 اكتشاف في الصحراء الغربية لوحدها
الاكتشافات دي مش صغيرة، احنا بنتكلم على 32.7 مليون برميل زيت مكثف و 46.5 مليار قدم مكعب غاز، الأرقام دي معناها ببساطة زيادة محتملة في الإنتاج اليومي بحوالي 41 ألف برميل نفط و1.37 مليار قدم مكعب غاز.
يعني باختصار، الصحراء الغربية مش بس أرض البترول والغاز لمصر دلوقتي، دي كمان مفتاح المستقبل علشان نضمن أمن طاقتنا ونبقى مركز إقليمي للطاقة في شرق المتوسط.
إخلاء مسؤولية إن موقع عاجل الإخباري يعمل بطريقة آلية دون تدخل بشري،ولذلك فإن جميع المقالات والاخبار والتعليقات المنشوره في الموقع مسؤولية أصحابها وإداره الموقع لا تتحمل أي مسؤولية أدبية او قانونية عن محتوى الموقع.
