منصات بانكير قدمت النهاردة عدد من التقارير والتحليلات الخاصة في الشأن الاقتصادي والمالي المصري، البداية بتقرير عن استهداف مصر زيادة الاستثمار الأجنبي 40% في 5 سنوات.
قال التقرير، إن الدكتور حسام هيبة، الرئيس التنفيذي للهيئة العامة للاستثمار، أعلن أن مصر حاطة هدف استراتيجي ضخم للـ5 سنين الجاية، وهو إن التدفقات بتاعة الاستثمارات الأجنبية المباشرة تزيد بنسبة 40% عن المستهدفات الحالية.. وده جزء من خطة كبيرة علشان مصر تبقى من أكتر 10 دول جاذبة للاستثمار على مستوى العالم، مش مرة واحدة وخلاص، لكن بشكل دائم ومستمر، وده معناه إن الحكومة شغالة على سياسات مدروسة وخطط على كل المستويات.
خلونا نبص على الأرقام شوية، في سنة 2024، مصر استقبلت استثمارات أجنبية بحوالي 47 مليار دولار، الرقم ده ضخم جدًا، بس لازم نعرف إن النصيب الأكبر كان من صفقة رأس الحكمة مع الإمارات، واللي لوحدها وصلت لـ 35 مليار دولار، ولو شلنا الصفقة دي من الحسابات، يفضل عندنا حوالي 12 مليار دولار استثمارات أجنبية، وده برضه أعلى من 2023 اللي كان 10 مليار بس، يعني النمو موجود بنسبة حوالي 20%..
دلوقتي، الحكومة مستهدفة إنها تجيب أكتر من 40 مليار دولار استثمارات في 2025 حتى لو مفيش صفقات ضخمة زي رأس الحكمة، وده بيعتمد على تحسين بيئة الأعمال، وتعديل القوانين وتوسيع الحوافز للمستثمرين.
أما بالنسبة للاستثمارات الخليجية، فهي واخدة نصيب الأسد، لأن في 2024، وصلت لـ41.5 مليار دولار مقارنة بـ 7.3 مليار بس في 2023، الإمارات في الصدارة بـ38.9 مليار دولار، بعديها السعودية بـ775 مليون، ثم قطر والكويت والبحرين بأرقام أقل شوية،وده بيعكس ثقة كبيرة جدًا من رؤوس الأموال الخليجية في السوق المصري.
منصات بانكير قدمت تقرير مختلف النهاردة عن قصص ثروة أغنى 5 سيدات في مصر.
التقرير أكد أن هناك أسماء لامعة في السوق المصري، واللي أرصدتهم وممتلكاتهم حطتهم في في مكانة أغنى السيدات في مصر، واللي أولهم سيدة الأعمال دينا غبور بنت رجل الأعمال رؤوف غبور واللي رفضت تتخلى عن أبوها، وراحت اشتغلت معاه في خط الشركة بتاعته اللي في القليوبية موظفة صغيرة عشان تتعلم الشغلانة من تحت، لغاية ما كبرت في الشركة.
التقرير أوضح أن تاني اسم هو لخديجة جمال مرات جمال مبارك وبنت الملياردير محمود الجمال واتجوزت جمال والفرق بينهم 21 سنة، وكانت ممكن تبقى السيدة الأولى لمصر لولا ثورة يناير، وثروتها وصلت لـ7 مليار جنيه عبارة عن أصول وأراضي في شرم الشيخ وأكتوبر وعقارات في مصر وفي باريس وأسطول سيارات وهي وريثة أبوها الوحيدة
أما السيدة التالتة، فهي فريدة خميس بنت الملياردير محمد فريد خميس ملك المنسوجات ومرات باسل الباز إمبراطور البتروكيماويات، وكانت ماسكة مجموعة النساجون الشرقيون وبقيت دراع أبوها اليمين، وثروتها بتوصل لرقم ضخم من المليارات.
أما الرابعة، فهي شاهيناز النجار ودي الزوجة الثانية لرجل الأعمال أحمد عز بتاع الحديد والصلب، واتفقت مع احمد عز علي الزواج، وكان عندها ثروة ضخمة جدا في عدد كبير من القطاعات خصوصا قطاع السياحة، وبعد زواجها من أحمد عز توسعت في الاستثمارات بالتعاون مع جوزها.
والأخيرة، عزة فهمي، والملقبة بملكة المجوهرات في مصر وبدأت في حياتها في الصاغة واتخصصت في تصميم الدهب واشتغلت مساعده مع صايغ عشان تفهم السوق كويس قوي، وراحت وهي صغيرة اشتريت فضة وسيحتها وصممت شوية حلقان فضة وباعتها بضعف تمنها، وبقيت تعمل ده كتير وتكسب، وبقيت ملكة سوق الدهب في مصر.
وحدة أبحاث بانكير قدمت تقرير خاص النهاردة عن استفادة مصر من الصراع العالمي في الاستثمار.
أكد تقرير بانكير، أن مصر بتحاول أنها تستفاد من الصراعات والتحولات الاقتصادية الكبيرة اللي بتحصل في العالم، وقدرت تنجح في جذب عدد كبير من الاستثمارات الأجنبية للسوق المصري، وكانت الهيئة الاقتصادية لقناة السويس هيا البطل في استقطاب الاستثمارات، خصوصا أن هيا منطقة استراتيجية موقعها بين 3 قارات وهما إفريقيا وآسيا وأوروبا.. وقناة السويس مش بس ممر مائي، ولكنها تحولت لمحور صناعي ولوجستي استراتيجي، وده بيخليها هدف لأي استثمار صناعي ضخم وتوسعات اقتصادية.
وأضاف تقرير بانكير، أن الصين واحدة من أكبر وأهم الدول اللي لها شراكات مع مصر واللي مستثمرينهم دخلوا مصر وبنو عدد كبير من المصانع في أغلب المجالات خصوصا في مجالات الطاقة الجديدة والمتجددة وتحليه المياه وإنتاج السيارات خصوصا السيارات الكهربائية وفي الوقت الحالي تحولوا لكيان اقتصادي متكامل بينتج ويصنع كل اللي محتاجه السوق المصري والقطاعات اللي عليها طلب كبير في التصدير.
الاتراك كمان بدأوا مشروعات تانية في المنطقة الاقتصادية لقناة السويس خصوصا في مشروعات الملابس الجاهزة زي مصنع جينز واللي شغالة بقوة كبيرة جدا في السوق المصري ونسبة كبيرة من إنتاجه بتتصدر للخارج خصوصا للسوق الأمريكي وده بسبب أن الرسوم الجمركية الأمريكية علي الملابس الجاهزة المصرية منخفضة جدا مقارنة بباقي الرسوم الموجودة علي دول العالم.
إخلاء مسؤولية إن موقع عاجل الإخباري يعمل بطريقة آلية دون تدخل بشري،ولذلك فإن جميع المقالات والاخبار والتعليقات المنشوره في الموقع مسؤولية أصحابها وإداره الموقع لا تتحمل أي مسؤولية أدبية او قانونية عن محتوى الموقع.
