أخبار عاجلة

حقيقة وجود 3 ملايين سبيكة ذهب مغشوشة في السوق.. وخدعة هتخسرك تحويشة العمر

حقيقة وجود 3 ملايين سبيكة ذهب مغشوشة في السوق.. وخدعة هتخسرك تحويشة العمر
حقيقة وجود 3 ملايين سبيكة ذهب مغشوشة في السوق.. وخدعة هتخسرك تحويشة العمر

مع كل ارتفاع في أسعار الدهب.. نفس القصة تتكرر: شائعات عن ذهب مغشوش في السوق المصري.. وناس بتقول ٣ مليون سبيكة عبارة عن نحاس مطلي.. وناس تانية بتأكد إن كل ده إشاعات.. الحقيقة فين؟ تعالوا نشوف.

أمير رزق، عضو شعبة الذهب، بيأكد: السبايك اللي مش مدموغة.. ساعات بنكتشف إنها نحاس مطلي.. واللي يجيبها بنشترط عليه نقطعها نصين عشان نتاكد. 

لكن في نفس الوقت.. كل دهب مدموغ، أو أي مشغولات مصرية عليها ختم الدمغة.. سليمة ١٠٠٪، وبتتباع وتتشرى بسهولة.

يعني المشكلة مش في المشغولات اللي انت بتشتريها من المحلات.. المشكلة بتكون في السبايك البلدي اللي بتيجي من بره.. أو اللي بتتباع من غير دمغة ولا علامة تجارية معروفة.. ودي اللي فيها مخاطرة.

46.jpg

سعيد إمبابي، المدير التنفيذي لمنصة آي صاغة لتجارة الذهب والمجوهرات قال إن مفيش دهب مغشوش في مصر.. ومفيش دهب مختلط بنحاس، وكل ده إشاعات. 

لكن رغم كده.. السوشيال ميديا مولعة: كلام عن ٣ مليون سبيكة مغشوشة دخلت البلد وقت أزمة الدولار.. وناس تانية تقول المشغولات كلها نحاس.. واللي يروح يبيع برّه يتضحك عليه.

تجارة الدهب المغشوش مش قاصرة على مصر.. تقارير دولية بتقول إنها تجارة بقت تكسب أكتر من المخدرات.. وأمريكا نفسها من أكتر الدول اللي فيها غش في الدهب. عشان كده.

شعبة الذهب في مصر شغالة على إنشاء مصفاة معتمدة دوليًا.. علشان نضمن المعايير ونقوي ثقة العالم في المنتج المصري.

مش بس السبايك البلدي هي اللى تخوف وإنها ممكن تكون كمان مغشوشة، في موضة جديدة بقت منتشرة على مواقع التواصل الاجتماعي واللي هي "الدهب زيرو مصنعية". ودي أكبر خدعة تسويقية.

مفيش حاجة اسمها كده.. شعبة الذهب بتقولك: كل مشغولة دهب ليها مصنعية.. دي تكلفة التصميم والصياغة والشغل. واللي بيتباع بزيرو مصنعية سواء في المحلات أو برة؟.. يبقى ذهب مستعمل معمول له إعادة طرح.. وفيه مخاطرة إنك تلاقي أحجار مش أصلية أو عيار مش مضبوط.

طب تعمل إيه لو هتشتري؟
١- ماتشتريش غير من محل معروف ومضمون.
٢- لازم القطعة تكون مدموغة بختم الدولة.
٣- لو جالك عرض على سبيكة ملهاش دمغة ولا علامة تجارية.. ارفض.
٤- ولو حابب تطمن بنفسك.. جرب اختبارات بسيطة زي المغناطيس، أو خدش خفيف في الجنب.. أو تروح لصائغ محترف يكشفها."

الخلاصة.. الدهب في مصر المدموغ مضمون.. لان المشغولات كلها نقية ١٠٠%.. والخطر الوحيد في السبيكة اللي من غير دمغة أو اللي جاية من برّه من غير ختم. 

خليك واعي. عشان الدهب مش بس زينة.. ده استثمار العمر.. وحرام تحويشة سنين تضيع في قطعة نحاس مطلية.

إخلاء مسؤولية إن موقع عاجل الإخباري يعمل بطريقة آلية دون تدخل بشري،ولذلك فإن جميع المقالات والاخبار والتعليقات المنشوره في الموقع مسؤولية أصحابها وإداره الموقع لا تتحمل أي مسؤولية أدبية او قانونية عن محتوى الموقع.

اشترك فى النشرة البريدية لتحصل على اهم الاخبار بمجرد نشرها

تابعنا على مواقع التواصل الاجتماعى

السابق موعد اجازة مولد النبي ٢٠٢٥ للقطاع الخاص في مصر.. التفاصيل كاملة
التالى رابط نتيجة الدور الثاني ثانوية عامة 2025