يا ترى إيه سر الزيادة الكبيرة في صادرات مصر لأمريكا؟ وازاى ارتفعت 15% في 6 شهور بس؟ وهل ده معناه إن الجنيه المصري كسب معركة المنافسة العالمية؟ وإزاي أمريكا بالذات بقت تستورد منتجات مصرية أكتر من أي وقت فات؟
من فترة قريبة.. كان الكلام كله عن أزمة الدولار.. والغلاء.. والركود.. لكن دلوقتي.. الأرقام بتقول حاجة تانية .. بتقول إن مصر عندها فرصة حقيقية لزيادة مواردها من العملة الصعبة.. مش بس من السياحة أو قناة السويس.. لأ.. كمان من التصدير.
طيب.. إيه اللي حصل وخلى صادرات مصر لأمريكا تزيد بالشكل ده؟
فيه سببين أساسيين..أولهم "منافسة الجنيه".. بعد التغيرات الأخيرة في سعر الصرف.. المنتجات المصرية بقت أرخص وأكتر تنافسية في الأسواق العالمية يعني المصدر المصري.. بيقدر يبيع منتجاته بأسعار أحسن من أي مصدر تاني.. وده بيخلي المستورد الأجنبي يفضل البضاعة المصرية عن غيرها.
وتاني حاجة.. "الضرائب الأمريكية".. أمريكا فرضت رسوم جمركية عالية جداً على المنتجات اللي جاية من دول زي الصين ودول جنوب شرق آسيا لكن المنتجات المصرية الرسوم الجمركية عليها منخفضة جداً.. وده بيدي ميزة قوية للمنتج المصري.. وبيخليه يدخل السوق الأمريكي بسهولة.
طيب.. إيه المنتجات اللي أمريكا بتشتريها من مصر؟
البيانات الرسمية بتقول إن أكتر حاجة أمريكا بتستوردها من مصر هي الملابس والمنسوجات.. القطاع ده لوحده بيمثل حوالي 50% من صادراتنا لأمريكا.. وكمان فيه المنتجات الغذائية.. اللي صادراتها زادت بشكل ملحوظ. وكمان المعادن والفازات.
الارقام دي كلها بتأكد حاجة واحدة.. إن مصر عندها إمكانيات تصديرية ضخمة.. وإنها لو عرفت تستغلها صح.. ممكن تحل جزء كبير من أزمة الدولار.
الدرس اللي لازم نتعلمه من الأرقام دي.. هو إن التحديات الاقتصادية اللي بنواجهها.. ممكن تكون هي نفسها الفرصة.
يعني مثلا تراجع سعر الجنيه.. اللي كان بيعتبر أزمة.. ممكن يكون هو اللي فتح الباب لزيادة الصادرات. وده بيأكد إن خطة الحكومة للتركيز على التصدير.. بدأت تجيب ثمارها.
المرحلة الجاية.. محتاجة تركيز أكتر على القطاعات الإنتاجية.. ودعم المصدرين.. علشان نفضل نحافظ على الزخم ده.. ونحول مصر لقوة تصديرية كبيرة.
إخلاء مسؤولية إن موقع عاجل الإخباري يعمل بطريقة آلية دون تدخل بشري،ولذلك فإن جميع المقالات والاخبار والتعليقات المنشوره في الموقع مسؤولية أصحابها وإداره الموقع لا تتحمل أي مسؤولية أدبية او قانونية عن محتوى الموقع.
