يا ترى موضوع إعادة تشغيل المصانع المتعثرة اللى الدولة بتتكلم عنه بقالها فترة بقى واقع ولا لسه كلام، وإيه هي فايدة المصانع دي وإزاي هتدعم الاقتصاد المصري؟.
الحقيقة، الفريق كامل الوزير، وزير الصناعة ونائب رئيس مجلس الوزراء للتنمية الصناعية، عمل جولة في مصانع "النصر للسيارات" بحلوان، عشان يأكد إن اللي اتقال عن إعادة تشغيل المصانع المتعثرة بيتنفذ على الأرض فعلا.
وكامل الوزير ومعاه وزراء قطاع الأعمال والعمل والأوقاف، دخلوا على خط متابعة المصانع اللي كانت واقفة من سنين، زي مصنع النصر للسيارات اللي تأسس من 1960، وكان حلم كل المصريين إن يشوفوه بيرجع تاني، والجولة دي بدأت من مصنع الملاكي اللي اتطور بالكامل بخطوط إنتاج جديدة ودهانات وأفران ومعايير بيئية عالمية، والمصنع ده لوحده مقام على مساحة 44 ألف متر مربع.
مش بس كده، الوزرا شافوا كمان مصنع الأتوبيسات اللي رجع يشتغل آخر السنة اللي فاتت، وبدأ يطلع أتوبيسات سياحية "نصر سكاي" وميني باص "نصر ستار" بنسبة مكون محلي وصلت ل63%، والأهم إن في طرازات جديدة صديقة للبيئة شغالة دلوقتي بالكهربا والغاز الطبيعي تحت اسم "نصر جرين"، يعني مش مجرد إعادة تشغيل لأ دي نقلة نوعية.
وخلال اللقاء مع العمال، كامل الوزير قال ان تشغيل مصنع متعثر أسهل وأسرع وأرخص من إنشاء مصنع جديد، وكمان شدد إن الموضوع مش بس اقتصاد لكنه كمان له بعد اجتماعي مهم جدا وهو الحفاظ على العمال وأسرهم وثروة مصر الصناعية، وده بيوضح إن الدولة ماشية بخطة واضحة على 7 محاور أهمها إعادة تشغيل المصانع اللى كانت واقفة.
والجديد هنا إن وزارة قطاع الأعمال كمان بتنسق مع شركات النقل والسياحة علشان تشترى الأتوبيسات اللي بتنتجها النصر وتدخلها الخدمة فورا، يعني الإنتاج مش هيقعد في المخازن، لأ ده هيخدم المواطن على طول سواء في المواصلات العامة أو في القطاع السياحي.
كمان، وزارة الصناعة بتشتغل في نفس الوقت على شراكات مع القطاع الخاص المحلي والأجنبي عشان يدخلوا استثمارات وتمويل وخبرات تكنولوجية جديدة، وده معناه إن المصانع مش هترجع بس عشان تنتج لكن كمان عشان تنافس وتصدر للخارج.
واللافت كمان إن الوزير أكد إن كل مصنع متعثر بيتفتح تاني بيرجع معاه أمل لآلاف الأسر اللي عاشت سنين في قلق بسبب توقف الشغل، والموضوع مش مجرد تشغيل خطوط إنتاج لكنه حياة كاملة بتتغير وبيوت بيرجع لها الاستقرار.
وعلى الهامش، الجولة شملت زيارة شركة الحديد والصلب اللي تحت التصفية، وده كان هدفه دراسة الاستغلال الأمثل للأصول الكبيرة اللي عندها سواء بالتصنيع أو شراكات صناعية جديدة، وده معناه إن الدولة مش سايبة أي أصل صناعي يتبخر من غير استفادة.
يعني اللي كنا بنسمعه بقى قدام عينينا، زب مصانع راجعة للشغل وإنتاج جديد بيطلع للنور وخطط مدروسة وشراكات مع القطاع الخاص، واللي جاي أكبر لأن لسه في مصانع تانية متعثرة الدولة ناوية تعيد تشغيلها عشان تدعم الاقتصاد المصري بشكل قوي الفترة الجاية.
إخلاء مسؤولية إن موقع عاجل الإخباري يعمل بطريقة آلية دون تدخل بشري،ولذلك فإن جميع المقالات والاخبار والتعليقات المنشوره في الموقع مسؤولية أصحابها وإداره الموقع لا تتحمل أي مسؤولية أدبية او قانونية عن محتوى الموقع.
