يا ترى إيه معنى إن التضخم السنوي في مصر ينزل ل13.9% في يوليو بعد ما كان 14.9% في يونيو، هل ده فعلا حاجة كويسة للمواطن البسيط ولا مجرد أرقام على الورق؟
في البداية، هنقولك يعني ايه تضخم، واللي هو معدل ارتفاع الأسعار على مدار السنة، يعني لما النسبة تقل فده معناه إن الأسعار لسه بتزيد بس بمعدل أبطأ.
والجهاز المركزي للإحصاء قال إن أسعار الأكل والشرب في المدن نزلت حوالي 3% مقارنة بشهر يونيو خاصة اللحوم والفراخ اللي نزلت 4.9%، والفواكه اللي هبطت 11%، والخضار اللي قل 7%، لكن في المقابل العيش والحبوب زادوا 0.4% والسمك زاد 0.2%.
والخبر الحلو إن التضخم نزل كتير عن القمة التاريخية 38% في سبتمبر 2023، وده بدعم من حزمة تمويل ب 8 مليار دولار مع صندوق النقد الدولي في مارس 2024، لكن التضخم الأساسي اللي بيستبعد الحاجات المتقلبة زي البنزين وبعض أنواع الأكل، طلع شوية ل 11.6% بدل 11.4%، وده معناه إن لسه فيه ضغوط سعرية.
والكلام ده معناه إن لما التضخم بينزل فبيبقى في فرصة أكبر للبنك المركزي إنه يخفض أسعار الفايدة، وده بيشجع الشركات تستثمر أكتر وبيقلل تكلفة القروض على الناس.
كمان، انخفاض التضخم بيحافظ على القوة الشرائية للمواطن لأن الأسعار بتزيد ببطء، فمرتبك أو دخلك يقدر يغطي مصاريفك بشكل أفضل من قبل.
ونقدر نقول، ان استقرار الأسعار كمان بيطمن المستثمر الأجنبي إنه يدخل السوق المصري، لأن المخاطر بتقل، لكن في نفس الوقت لسه فيه تحديات زي أسعار الطاقة العالمية أو تقلب سعر العملة ودي لو حصلت فيها أزمات ممكن تعكس الاتجاه.
والخلاصة، هي ان انخفاض التضخم خبر إيجابي لانه بيديك أمل إن السوق بيمشي في اتجاه أحسن، لكن ده محتاج سياسات اقتصادية مستمرة ومتابعة دقيقة من الحكومة والبنك المركزي عشان نحافظ على الاستقرار ده.
إخلاء مسؤولية إن موقع عاجل الإخباري يعمل بطريقة آلية دون تدخل بشري،ولذلك فإن جميع المقالات والاخبار والتعليقات المنشوره في الموقع مسؤولية أصحابها وإداره الموقع لا تتحمل أي مسؤولية أدبية او قانونية عن محتوى الموقع.
