لو بتفكر تجيب عربية معفاة من الجمارك لو عندك حد فى عيلتك من ذوي الهمم وبتفكر تجيب عربية على اسمه لازم تشوف التقرير ده وتعرف التعديلات الجديدة والخطيرة اللى حصلت فى قانون ذوي الاعاقة.
الحكومة المصرية طلعت قرار جديد يخص عربيات ذوي الاحتياجات الخاصة.. فاكرين القانون القديم اللي كان بيقول إن من حقك تستورد عربية معفاة من الجمارك كل 5 سنين؟ الحكومة غيرت المدة دي.
الجديد هو إن من حقك تستورد عربية معفاة من الجمارك مرة واحدة كل 15 سنة بس، بدلًا من 5 سنين.
طب إيه هي الشروط الجديدة؟
العربية اللي هتستوردها هتكون معفاة من الجمارك وكمان ضريبة القيمة المضافة.
لازم تكون للشخص صاحب الإعاقة نفسه، سواء كان قاصر أو بالغ.
تكون للاستخدام الشخصي، يعني يا إما يسوقها بنفسه، أو سائقه الخاص، أو حد من قرايبه من الدرجة الأولى.
في شرط تاني مهم، وهو إنك ما تكونش من المستفيدين بمزايا الضمان الاجتماعي، وكمان لازم تدفع تمن العربية من حسابك الشخصي أو من حساب حد من قرايبك من الدرجة الأولى.
طب إيه اللي ممكن يخليك تخسر العربية دي؟
ببساطة.. لو فكرت تبيعها أو تتصرف فيها بأي شكل خلال أول 5 سنين من استلامها.. أو استخدمتها في أي حاجة غير الغرض المخصص ليها، ده هيعرضك لدفع الجمارك والضريبة كلها.. ولو لا قدر الله الشخص توفى خلال الـ 5 سنين دول، ورثته ممكن يتصرفوا فيها بعد ما يدفعوا نص الجمارك والضريبة.
كمان القانون الجديد حط عقوبات قوية جدًا لأي حد يحاول يتحايل على القانون ده لو حد زور بطاقة الإعاقة أو استعملها وهو عارف إنها مزورة، العقوبة هتكون سجن يوصل لـ 10 سنين وغرامة من 10 آلاف لـ 100 ألف جنيه.
ولو حد قدم بيانات غلط عشان يستفيد من المزايا دي من غير وجه حق، نفس العقوبة، أما لو انتحلت صفة شخص من ذوي الإعاقة عشان تستفيد من أي ميزة، هتتحبس من 6 شهور وغرامة من 50 ألف لـ 200 ألف جنيه.
يعني من الآخر، القانون واضح، وشدد العقوبات عشان يمنع أي تلاعب.. كل التفاصيل دي هتكون في اللائحة التنفيذية للقانون، اللي هتحدد درجات الإعاقة وشروطها بالظبط.
إخلاء مسؤولية إن موقع عاجل الإخباري يعمل بطريقة آلية دون تدخل بشري،ولذلك فإن جميع المقالات والاخبار والتعليقات المنشوره في الموقع مسؤولية أصحابها وإداره الموقع لا تتحمل أي مسؤولية أدبية او قانونية عن محتوى الموقع.
