عاجل|"جابوا بياناتها منين".. سرقة عميلة بالبنك الأهلي ومناشدات لوزارة الداخلية بالتدخل

تعرضت والدة الزميلة إيمان علي ، الصحفية بجريدة اليوم السابع للسرقة ، بسبب تشكيل عصابي ادعي عمله بالبنك الأهلي.

وقالت الزميلة إيمان علي،" تحذير مهم لازم يوصل للناس كلها.. طريقة للنصب باسم البنك الأهلي.. أمي تعرضت لنصب كبير باسم البنك الأهلي، وهنا البنك برئ، لكن أنا بناشد السيد محمد الأتربي وهو رجل وطني محترم، ليتدخل لإنقاذ الموقف، والقصة حصلت كالتالي:" تلقت أمي اتصال من شاب ادعى عمله في البنك الأهلي، وبدأ المكالمة معاها عن فيزا المشتريات وعلمه أنها وقفتها وبعد كدة بدأ يكلم عن حسابها وتفاصيل كتير معرفش جابها منين، تحت مبرر إنه بيعمل تحديث للبيانات".

وتابعت،" في البداية، أمي رفضت وقالتله انا بعمل التحديث في البنك، قالها لا دي خدمة جديدة عاملينها لكبار السن، وحاليًا ف مشكلة كبيرة لازم تعملي التحديث دلوقتي يا إما الحساب هيتقفل وهتضطري تروحي أكتر من فرع عشان تردي فلوسك".. مصدقتوش، راح بلغها باسم الفرع ومدير البنك واسمه والكود الخاص بيه والحقيقة أنه ذكر جزء من المعلومات الخاصة بحسابها فصدقت وبدأت تديله البيانات.

وتابعت، الاحتيال من النصاب للأسف كان واضح ويقدر يكشفه أي شاب زينا، لكن النصاب استغل كبر السن عند والدتي، وعدم وعيها بالنظم الإلكترونية، واقنع أمي أنه بيعمل ما يسمى بإعادة تنشيط للحساب، ومن هنا  كانت الكارثة، وبعد ما خوفها بشكل بشع عن غلق حسابها وأنه الفلوس هتروح عليه، أمي أعطته بعض البيانات..ومع الأسف..بدأت تقتنع وتمشي مع طلباته علشان التنشيط المزعوم للحساب، وللأسف تم تحويل المبالغ على أكتر من مرة في لحظة تغفيل واستغلال منه لـ"قلة" وعي أمي، وترهيبها بشكل غريب من خلال معرفته بعض البيانات عنها وقدر يعمل جريمته" ليتم سحب 135 الف من حسابها ".

وقالت ،" حررت محضر برقم 5276 إداري الوراق لسنة، ٢٠٢٥، وبعد كدة روحنا مباحث الأموال العامة وعملوا ملف برقم المحضر المسجل في قسم الوراق وكان في تفهم وتلقي واستيعاب للي حصل وتبين أنه الرقم اللي كلمها من حد ف المنيا.. إحنا هنا أمام تشكيل عصابي بيستخدم لغة "وكأنها تنويم مغناطيسي" وعارف هو بيخاطب مين وهم فئة كبار السن  وأصحاب المعاشات، واللي الحقيقة رغم حملات التوعية إلا أنه لازال ليهم لغتهم اللي قادرة تخوف وتستقطب كبار السن للتجاوب معهم".

واستطردت،" أغرب ما في الأمر أن الفلوس أتحولت على عدد من المحافظ الإليكترونية النشطة التابعه لعدد من شركات الاتصالات ".