يا ترى ايه حكاية ال 11 بير الجديدة بتاعت الغاز الطبيعي اللى مصر هتحفرها الفترة الجاية؟ وهتضيف ايه لملف انتاج الغاز في مصر؟ ومين الشركات اللى هتنفذ المشروعات البترولية الجديدة ؟
اللي حصل ببساطة إن وزارة البترول أعلنت رسميًا إن مصر بدأت تنفيذ برنامج متكامل لحفر 11 بئر جديدة للغاز الطبيعي.. وده مش رقم وخلاص.. ده برنامج من العيار التقيل.. لأن الآبار دي هتضيف حوالي 160 مليار قدم مكعب من الغاز للسوق.. بمتوسط إنتاج يومي إضافي يوصل لـ100 مليون قدم مكعب من الغاز وكمان 2000 برميل متكثفات.
يعني بالبلدي كده.. مصر داخلة في سباق جديد لتأمين الطاقة وزيادة الإنتاج المحلي علشان تفضل الشبكة القومية للغاز شغالة بكفاءة وتغطي احتياجات البلد وكمان التصدير.. وأول خطوة على الأرض كانت في محافظة الدقهلية.
وزير البترول "كريم بدوي" بنفسه عمل زيارة ميدانية لموقع بئر اسمه "بيجونا-2".. البير ده موجود في منطقة امتياز "نيو منزلة" واللي بتشغلها شركة الوسطاني للبترول.. والشركة دي شغالة بالشراكة مع دانة غاز الإماراتية.. يعني فيه شغل مشترك مع مستثمرين دوليين.
البير ده مش عادي.. لأنه بئر تقييمي لمنطقة تنمية اسمها "بيجونيا".. الهدف منه إنه يقيّم احتياطي الغاز الموجود في تكوين "أبو ماضي". واللي بيقع تحت طبقة اسمها "المايوسين".
التقديرات الأولية بتقول إن فيه خزان غاز ممكن يوصل لـ9 مليار قدم مكعب تحت الأرض.. يعني بير واحد بس من الـ11 ممكن يغيّر معادلة الإنتاج في منطقة كاملة.
وزارة البترول بتقول إنها بتتابع تنفيذ البرنامج بكل تفاصيله.. وبتشجع شركاتها التابعة إنها تحقق أكبر استفادة ممكنة من أي مورد متاح.. خصوصًا مع وجود حزم تحفيزية جديدة طرحتها الدولة علشان تشجع الإنتاج المحلي سواء في البترول أو الغاز
وده بيحصل بالتعاون مع الشركاء الأجانب والمستثمرين اللي شايفين إن مصر بقت أرض واعدة للطاقة مش بس على مستوى الشرق الأوسط لكن على مستوى العالم.
خلينا نقول إن التحرك ده مش مجرد شوية آبار.. دي خطوة واضحة ومقصودة علشان نقلل الاستيراد .. وبنعزز الاستقرار الداخلي في سوق الطاقة.
وفي نفس الوقت نزود فرص التصدير لما السوق العالمي يكون محتاج غاز أكتر وأسعاره تكون مغرية.
السؤال هنا: هل مصر راجعة بقوة لسوق الغاز؟ ولا دي مجرد خطة مؤقتة علشان نسد عجز؟
لو بصينا على الأرقام والمستثمرين اللي داخلين .. واضح إن الخطة أكبر بكتير من مجرد 11 بير.. وواضح إننا داخلين على مرحلة جديدة من انتاج الغاز فى مصر.
إخلاء مسؤولية إن موقع عاجل الإخباري يعمل بطريقة آلية دون تدخل بشري،ولذلك فإن جميع المقالات والاخبار والتعليقات المنشوره في الموقع مسؤولية أصحابها وإداره الموقع لا تتحمل أي مسؤولية أدبية او قانونية عن محتوى الموقع.
