هو إيه اللى حصل في سوق الدهب؟ وليه الأسعار نزلت فجأة بعد ما كانت طايرة؟ ويا ترى الانخفاض ده لحظي.. ولا بداية لموجة هبوط؟
وإيه علاقة أمريكا والسندات بأسعار الدهب في مصر؟
لو متابع السوق كويس .. أكيد لاحظت إن أسعار الذهب في مصر تراجعت بشكل طفيف النهارده.. وده رغم إن البورصات العالمية في عطلتها الأسبوعية.. لكن اللي حصل مش من فراغ.. ده نتيجة أحداث اقتصادية مهمة بتحصل برّه، وأثرها بيبان عندنا هنا.
نبدأ من السعر.. النهارده سعر جرام عيار 21 في مصر سجل حوالي 4620 جنيه.. بعد ما كان قافل مبارح عند 4635 جنيه.. يعني نزل تقريبًا 15 جنيه.
أما عيار 24 وصل لـ5280 جنيه.. وعيار 18 بقى بـ3960 جنيه.. وعيار 14 نزل لـ3080 جنيه..
والجنيه الدهب (8 جرام عيار 21) سعره وصل لـ36960 جنيه.
طيب إيه اللى خلّى الأسعار تنزل؟
السبب الأساسي هو اللي بيحصل في السوق العالمي.. سعر الأوقية نزل من 3371 دولار لـ 3337 دولار في نهاية الأسبوع.. يعني خسارة حوالي 34 دولار في أسبوع واحد.. وده حصل نتيجة كذا حاجة أولها ..صدور بيانات اقتصادية قوية من أمريكا.. وخصوصًا من سوق العمل.. بيانات بتقول إن الاقتصاد الأمريكي ماشي بشكل إيجابي وده خلى المستثمرين يحسوا إن مافيش خطر كبير في الأفق.
تانى حاجة.. فيه تقدم في المفاوضات التجارية ما بين أمريكا وشركاءها.. وده قلّل الطلب على الذهب كـ "ملاذ آمن".. لأن وقت الأزمات الناس بتهرب للدهب.. لكن وقت الاستقرار بيرجعوا يستثمروا في أدوات مالية تانية.
وتالت حاجة .. لدولار الأمريكي نفسه ارتفع قدّام باقي العملات.. ورغم إن عوائد سندات الخزانة الأمريكية نزلت شوية.. بس ارتفاع الدولار خلى الدهب أغلى على الناس اللى معاهم عملات تانية.. وده قلّل الطلب عليه في السوق العالمي.
يعني ببساطة.. الأخبار الكويسة عن الاقتصاد الأمريكي خلت المستثمرين يبعوا دهب.. ويحوّلوا فلوسهم لحاجات تانية زي الأسهم أو السندات أو حتى الدولار نفسه.. وده ضغط على السعر عالميا.
أما محليًا في مصر.. فالدهب مرتبط بالأوقية العالمية وسعر الدولار قدام الجنيه.. ومع إن الدولار مستقر نسبيًا في البنوك.. لكن السوق بيتأثر فورًا بأي حركة في السعر العالمي.
طيب.. السؤال الأهم: هل دهب هيكمّل نزول؟ ولا ممكن يرجع يطلع تاني قريب؟
الموضوع متعلق باللي هيحصل الأسبوع الجاي في الاقتصاد الأمريكي والعالمي.. لو البيانات فضلت إيجابية.. والتوترات السياسية فضلت هادية.. ممكن الدهب يكمّل هبوط تدريجي.. لكن لو حصلت أي توترات أو إعلان عن بيانات سلبية.. ممكن الأسعار ترجع تطلع بسرعة.
كمان متنساش إننا داخلين على موسم عالمي مهم.. وهو موسم الشراء في الربع الأخير من السنة.. وده دايمًا بيأثر على الطلب.. خصوصًا من الهند والصين اللى بيشتروا كميات كبيرة جدًا من الدهب قبل المناسبات.
من الآخر .. أسعار الدهب نزلت نتيجة هدوء في الأسواق العالمية وتحسّن الاقتصاد الأمريكي.. وده قلّل الطلب عليه كملاذ آمن
لكن أي تغير مفاجئ في الأحداث السياسية أو الاقتصادية ممكن يغيّر المعادلة في أي لحظة.
إخلاء مسؤولية إن موقع عاجل الإخباري يعمل بطريقة آلية دون تدخل بشري،ولذلك فإن جميع المقالات والاخبار والتعليقات المنشوره في الموقع مسؤولية أصحابها وإداره الموقع لا تتحمل أي مسؤولية أدبية او قانونية عن محتوى الموقع.
