سمعنا كلام كتير وحلو وجميل عم انضمام مصر لتحالف بريكس، لكن اية الفائدة اللي عادت علي مصر من الانضمام لتحالف زي ده.. وآية مستهدفات الحكومة من الانضمام له.. وهل هنشوف شراكات جديدة بين مصر ودول الاتحاد.
الفترة دي الحكومة ممثلة في رئيس مجلس الوزراء الدكتور مصطفى مدبولي مشاركه في واحدة من أهم الاجتماعات الاقتصادية في العالم وهو تجمع بريكس واللي بيعقد اجتماعاته حاليا في البرازيل، علشان يناقشوا القضايا الاقتصادية اللي بتهم الدول الأعضاء في التكتل، وكمان هيناقشوا ازاي يفعلوا دور التجمع بشكل أكبر من كده، وكمان هيناقشوا خطة اصدار عمله موحدة للدول الأعضاء في للتحالف علشان تواجه التوغل الكبير للدولار الامريكي في التعاملات الاقتصادية.
طيب إزاي مصر استفادت أو هتستفاد من الانضمام لتحالف وتجمع بريكس ؟.
في البداية لازم نكون عارفين ان تجمع بريكس بيضم عدد كبير من القوى الاقتصادية الضخمة في العالم زي الصين وروسيا والهند والبرازيل وجنوب أفريقيا، والتحالف ده مش بس تكتل سياسي بس لا ده قوة اقتصادية عملاقة، بتمثل حوالي 40% من سكان العالم وأكثر من 25% من الناتج المحلي العالمي، بالنسبة لدولة زي مصر، الدخول في النوع ده من التحالف له اكثر من معني أولهم تنويع الشراكات الاقتصادية وفتح أسواق جديدة للتصدير والحصول على تمويلات بديلة بشروط ميسرة.
انضمام مصر لتحالف بريكس فتح لها اول طرق وهو إمكانية الحصول علي قروض تمويلية من بنك التنمية الجديد التابع لتحالف بريكس، اللي بيوفر تمويلات بمزايا أفضل من مؤسسات التمويل الغربية، وكمان التحالف ده بيدي الفرصة للدول الأعضاء فيه أنهم يعملوا تجارة بينية بالعملة المحلية مع دول البريكس، وده بيقلل الضغط على الاحتياطي النقدي للدول الأعضاء في التكتل من الدولار، وكمان فتح لمصر أسواق تصدير جديدة في دول جديدة علي الصادرات المصرية زي الهند والبرازيل واللي تحولت لاسواق واعدة للمنتجات الزراعية والصناعية المصرية بعيد عن أسواق أوروبا، وكمان فتح لمصر باب جديد لجذب الاستثمارات الأجنبية المباشرة من دول دي الهند والصين واللي حاليا في شركات من الدول دي دخلت مصر وعملت مشروعات استثمارية كبيرة في البنية التحتية والطاقة وبقت لهم أكثر من استثمار في السوق المصري.
إخلاء مسؤولية إن موقع عاجل الإخباري يعمل بطريقة آلية دون تدخل بشري،ولذلك فإن جميع المقالات والاخبار والتعليقات المنشوره في الموقع مسؤولية أصحابها وإداره الموقع لا تتحمل أي مسؤولية أدبية او قانونية عن محتوى الموقع.
