مصر هتغير خريطة الاقتصاد.. اكتشاف تقاطعات غنية بالذهب والفضة - غاية السعودية

غاية السعودية يكتُب.. ليه مصر هتقدر تغير خريطة العالم وخصوصا الاقتصاد؟.. هل لأنها اكتشفت تقاطعات غنية بالدهب والفضة؟.. بس إزاي هتقدر تستفيد من الاكتشافات دي؟

النهاردة مصر بتقول للعالم أنها مش محتاجة مساعدات خارجية، لأنها عندها موارد وثروات طبيعية في كل المجالات، لأن عندنا كل يوم اكتشاف جديد، زي التقاطعات اللي لقيناها غنية جدًا بالدهب والفضة في الصحراء الشرقية.

آه والله، مش مجرد شوية شواهد أو كلام، دي نتايج حقيقية من أعمال حفر وتنقيب، وأثبتت إن فيه تركيزات عالية جدًا من الدهب والفضة في مناطق معينة هناك.

يعني إيه الكلام ده؟
يعني إننا قدام فرصة تاريخية، ممكن تغير شكل الاقتصاد المصري تمامًا، الدهب والفضة مش بس معادن ثمينة، دول بيمثلوا أصول اقتصادية قوية، والدول اللي عندها مناجم ومعادن نادرة بتبقى ليها مكانة وتأثير عالمي، بس النهاردة مصر بتقول للعالم أنا عندي كنوز في أرضي وبعرف استخرجها وأنميها.

طيب إيه اللي بيحصل دلوقتي؟.. فيه شركات تنقيب شغالة بتكنولوجيا حديثة جدًا، والنتايج الأولية واعدة جدًا، ووزارة البترول أعلنت أنها بتجهز لاستثمارات ضخمة في المناطق دي، وده جزء من خطة أكبر لتطوير قطاع التعدين في مصر، واللي بيستهدف يخلي مصر مركز إقليمي لتصنيع وتصدير المعادن.

يعني ببساطة، فيه فرص شغل ضخمة هتتفتح في مناطق التنقيب والمعالجة وفيه استثمارات أجنبية داخلة بمجرد ما تتأكد الكميات التجارية، ده غير كمان فيه صادرات جاية هتدخل عملة صعبة وتقلل الضغط على الاقتصاد.

اللي بشرتنا بالخبر ده، هي شركة "أتون ريسورسز" واللي أعلنت عن نتايج جديدة ومبشرة جدا من برنامج الحفر الماسي في منطقة أبو مروات، وده واحد من أهم مراحل التقييم الفني لأي منطقة فيها معادن.

بس هما لقوا إيه بالظبط؟.. في الحفر الأخير، اكتشفوا تقاطعات معدنية عالية القيمة، يعني باختصار لقوا دهب وفضة بتركيزات كبيرة، يعني دهب وفضة بأرقام تقيلة جدًا، وده بيأكد إن المنطقة غنية فعلًا، مش بس كده، دي كمان بتدي مؤشرات قوية إن فيه امتدادات أعمق وأغنى جوه الصخور.

برنامج الحفر ده بدأ في يونيو 2024، وخلص بنجاح بعد ما حفروا 113 حفرة، بطول إجمالي حوالي 9643 متر، التركيز كان على مناطق سطحية ماكنش حد حفر فيها قبل كده، وعشان يوصلوا لأفضل نتايج، اشتغلوا بزوايا معينة وعمق محسوب علشان يوصلوا للطبقات اللي فيها المعدن.

ودي مش أول مرة الشركة تطلع بنتايج مبشّرة، لأ.. ده استمرار لبيانات واعدة جدًا أعلنت عنها قبل كده، واللي بتأكد إن منطقة أبو مروات جواها ثروة كبيرة، واللي أهم من كده؟.. أن الاكتشاف ده بيقوي خطة الشركة في إنها تطور مشروع تعدين كبير، يكون من أعمدة النمو المستدام في قطاع التعدين المصري، وده بيأكد أن الصحراء الشرقية واحدة من أغنى المناطق المعدنية في الشرق الأوسط، وجزء مهم جدًا من "الدرع العربي النوبي" اللي مليان فرص تعدينية لسه ما اتفتحتش.

الخلاصة؟.. أن مصر ماشية على طريق إنها تبقى قوة تعدينية كبيرة، مش بس في الدهب، لكن في كل أنواع المعادن اللي عليها طلب عالمي.. الكنز تحت رجلينا، واحنا أخيرًا بدأنا نطلع اللي فيه.