مريم همام تناشد الرئيس السيسي لإنشاء مستشفيات متخصصه لـ"أمراض المناعة"

بدأت قصة مرضي في صمت غريب، ألم شديد، وأعراض كتيرة أوي، هبوط، وتساقط شعر، وفقدان للشهية، ونوم كتير، وعدم قدرة على المشي، بدأت أكشف، وأعمل تحاليل، الدكاترة شكوا يكون عندي أورام، طلع بالفعل فيه ورم بالغدد الليمفاوية، بس لسه فيه تعب وألم وأعراض، عملت بذل نخاع، واكتشفت إني مريضة ذئبة حمراء، كانت كبير صدمة بالنسبة ليا، الاسم غريب جدا عليا، وعلى كل اللي حواليا،  

سألت قالوا لي ده مرض من  أمراض المناعة الذاتية، مرض نادر وخطير، بيهاجم فيه الجهاز المناعي أعضاء الجسم بدل من حمايتها.

مرض الذئبة الحمراء (Lupus) ملوش علاج نهائي أو شفاء تام حتى الآن، لأنه مرض مناعي مزمن، وغير معدّى، لكن في علاجات فعالة بتساعد جدًا في السيطرة على الأعراض.

كان الخبر صادم أوي بالنسبالي لكنه كان برضو كان بداية طريق جديد؛ على الأقل أصبح للمعركة والمرض والألم اسم، وبقيت عارفه أنا عندي ايه، بعد فترة من المرض والأدوية حصل لي ضغط نفسي كبير أوي، وفجأة حصل لى انتكاسة و لقيت نفسي في الرعاية المركزة و قعدت تلت شهور كانوا بمقام تلت سنين، بس الحمدلله، خرجت بفضل ربنا عليا..

بعد ما خرجت قررت إني لازم أفيد الناس ومحدش يعاني معاناتي، بدأت أعمل قناة على التيك توك وقنوات تانية كتير وصفحات أوعي الناس بالمرض، وانصحهم يخلوا بالهم من صحتهم النفسية، بدأت فيديوهاتي تتشاف وتتسمع وصلت لأكثر من مليون مشاهدة، خرجت في برامج تلفزيونية أعلن عن مبادرتي توعية الناس بأمراض المناعة خصوصا الذئبة الحمراء، بدأ يجي لي عشرات الرسائل يوميا وأرد عليهم بكل حب وكل ارتياح، علشان محدش يعاني من اللي أنا عانيته.

آخر حاجة كانت مناشدتي للسيد رئيس الجمهورية بحلمي الكبير إن يكون فيه مستشفى متخصصة لمرضى المناعة تعالج كل مرضى المناعة في مصر.