خلاص العجلة دارت في رأس الحكمة.. وخلال شهور أو أيام هنشوف أول مشروع كبير فى تطوير المنطقة .. فيا ترى ايه الجديد ؟ وليه بنقول كده ؟ وامتى رأس الحكمة هيتم تطويرها بشكل كامل؟ وإزاي أكبر مشروع في تاريخ مصر هيغير وش الاقتصاد للأبد؟
شركة "مدن القابضة" الإماراتية .. اللي هي الدراع التنفيذي لمجموعة "إيه دي كيو القابضة" .. خلاص استلمت أول مرحلة من المشروع الضخم ده في الساحل الشمالي. تخيلوا معايا المساحة قد إيه؟ .. حوالي 8.5 مليون متر مربع .. يعني تقريبًا 2000 فدان. مساحة مش قليلة أبدًا يا جماعة .. دي أكبر من مدن بحالها.
والموضوع ده مش وليد اللحظة .. ده اتفاق تاريخي تم توقيعه في فبراير 2024. الاتفاق ده دخل مصر 35 مليار دولار .. من الـ 35 مليار دولار دول .. فيه 11 مليار دولار مصر اتنازلت عنها من ودائع إماراتية كانت موجودة في البنك المركزي المصري .. ودول هيتم استثمارهم جوه مصر .. يعني هيلفوا في شرايين الاقتصاد بتاعنا. والباقي .. الـ 24 مليار دولار .. دول تدفقات نقدية مباشرة دخلت البلد من بره .. يعني دولار جديد دخل السوق المصري.
ولما نتكلم عن مشروع رأس الحكمة .. إحنا مش بنتكلم عن قرية سياحية وخلاص .. إحنا بنتكلم عن مدينة متكاملة .. مدينة على مساحة 170 مليون متر مربع. يعني بنتكلم عن مدينة سكنية .. تجارية .. ترفيهية .. رياضية .. وكل اللي تتخيلوه.
المشروع ده هيضم مدن ترفيهية .. ومدن رياضية .. وكمان هيتعمل فيه مطار خاص بالمنطقة. يعني مش هتحتاج تسافر بعيد عشان تستمتع بكل ده. والحكومة المصرية عندها طموح كبير جدًا للمشروع ده .. متوقعين إنه يجذب حوالي 8 مليون سائح زيادة بعد ما يكتمل. تخيلوا الرقم ده .. 8 مليون سائح زيادة يعني إيه للاقتصاد المصري؟ .. يعني عملة صعبة كتير هتدخل البلد .. يعني فرص عمل أكتر .. يعني انتعاش في كل القطاعات.
الخبر الحلو بقى .. إن المرحلة الأولى من المشروع دي قربت تتطلق رسميًا.. والشركة المستثمرة حاطة تارجت مبيعات مش عادي أبدًا .. 300 مليار جنيه مصري بحلول نهاية السنة دي بس. رقم ضخم جدًا بيدل على حجم الطموح والثقة في المشروع.
ده غير إن الاتفاق كمان بيتضمن إن الحكومة المصرية هتاخد 35% من أرباح المشروع ده على مدار فترة التنفيذ. يعني مش بس استثمارات هتجيلنا من بره .. لأ ده كمان هنشارك في الأرباح. والتوقعات بتقول إن إجمالي الاستثمارات في المشروع ده ممكن توصل لـ 150 مليار دولار على مدار فترة التنفيذ. رقم تاريخي بكل المقاييس.
التوقعات بتقول إن إجمالي الاستثمار التراكمي للمشروع ده ممكن يوصل لـ 110 مليار دولار بحلول سنة 2045. يعني بعد حوالي 20 سنة. وده رقم غير عادي يا جماعة.
الأهم من كده .. إن المشروع ده هيساهم في الناتج المحلي الإجمالي للاقتصاد المصري بحوالي 25 مليار دولار كل سنة. تخيلوا الرقم ده .. 25 مليار دولار زيادة للاقتصاد المصري كل سنة! .. ده غير إنه هيوفر حوالي 750 ألف فرصة عمل بشكل مباشر وغير مباشر. يعني أسر كتير هتتفتح بيوتها .. وشباب كتير هيلاقي فرصة شغل.
إخلاء مسؤولية إن موقع عاجل الإخباري يعمل بطريقة آلية دون تدخل بشري،ولذلك فإن جميع المقالات والاخبار والتعليقات المنشوره في الموقع مسؤولية أصحابها وإداره الموقع لا تتحمل أي مسؤولية أدبية او قانونية عن محتوى الموقع.
