رد ناري من"محمد صلاح العزب" على أيمن بهجت قمر بشأن كلمات ألبوم "الهضبة"

خرج الكاتب والسيناريست محمد صلاح العزب عن صمته ليعلق على الجدل الدائر حول رأيه في كلمات بعض أغاني ألبوم الفنان عمرو دياب الجديد، بعدما تلقى ردا من الشاعر أيمن بهجت قمر، أحد المشاركين في الألبوم، اعتبره العزب خارجًا عن حدود النقد الفني.

وقال العزب في منشور نشره عبر صفحته الخاصة على موقع "فيس بوك": “فيما يتعلق بموضوع كلمات ألبوم عمرو دياب عشان في مواقع كتير ناشرة كلام محصلش، وأنا راجل مسالم لا بحب الخناق ولا وجع القلب، وده آخر كلام هقوله في الموضوع ده ما لم يجد جديد”.

وتابع: "اللي حصل كالتالي: كتبت على صفحتي الخاصة اللي مشتريها بفلوسي وبدفع النت بتاعها على حسابي، رأيي المتعلق بذوقي اللي هو بتاعي ويخصني، إن مش عاجبني بعض كلمات أغاني ألبوم عمرو دياب. ما أنا حر يا عم، لا جبت سيرة حد بالاسم، ولا قلت كل الأغاني، مع إنه برضه عادي".
 

وأضاف: “قام الزميل اللي ليه كل احترام وتقدير الأستاذ أيمن بهجت قمر، البطحة وجعته تقريبا، فاتنحرر رغم إنه مجرد شاعر من وسط ١٠ شعرا كبار مثلا في الألبوم، ودخل يقولي ما احنا بنتفرج على مسلسلات سطحية ومبنتكلمش، اللي هو انت برضه لما تلاقي زمايلك عاملين حاجات سطحية متتكلمش”.

وأشار ألى: “هو المنطق ده متسق مع طريقة التفكير دي جدا، لكن أنا يا سيدي مبتضايقش لما حد ينتقد شغلي، وعمري ما رديت على حد قال شغلك حلو ولا وحش، ويا ما اتقال حلو واتقال وحش ودي طبيعة الشغلانة”.

وأكد: 'كمان صحيح، المسلسلات بتاعتي اللي مش عاجبة الأستاذ دي هو اللي كاتب لها أغاني التترات أساسا، بس هو اكتشف إنها كخة دلوقتي عشان التترات دي نحتاية ع السريع كده، مش لازم يعرف المسلسل ده حلو ولا وحش أصلا قبل ما يقرر يشارك فيه.. المهم الشيك".

وتابع: “وأكيد يا عم أيمن واحد زيك عنده توليفة فاخرة من الأعمال الساذجة من أول مسلسليكو وليالي الحلمية ٦ اللي أكيد معذب أسامة آنور عكاشة في تربته، وقنبلة الضحك عنتر ابن ابن شداد لحد فلانتينو وأهل الكهف والهنا اللي أنا فيه وغيره وغيره، حد ده شغله ودي دماغه، ما يسكت، وما يتكلمش عن العمق خالص.. مش لايق يعني”.

واستطرد: “ويا عم أنا شغلي كله وحش، وأوحش واحد، متزعلش نفسك، الأستاذ المبجل ده كان عندي على فيس بوك في الأصدقاء، ومسحته من سنة ونص ولا حاجة عشان نفس الفكرة والشخصية المهزوزة وإنه قموصة كل ما حد ينتقد شغله من الجمهور يقعد يتخانق معاه، والواحد معندوش مرارة زيادة يقعد يتفرج على الهم ده، فمسحته في صمت وخلصنا”.

وتابع: “وبالمناسبة انت حسيت صح، هو في حاجة في ٢٠٢٥ اسمها رماني ف شبكه وعيوني ارتبكوا؟ يا راجل؟ مش كده، وآخر نصيحة من صديق فيس بوك قديم اشتغل أقل بجودة أكبر، عشان هي مش مسابقة على لقب شيخ النحاتين”.