يا ترى ليه الدولار بدأ يتراجع اليومين اللي فاتوا، وهل ده معناه إن الجنيه المصري بيرجع يقوى، ولو فعلا الدولار بينزل هل ده هيستمر ولا مجرد موجة مؤقتة؟
لو انت متابع حركة السوق، أكيد لاحظت إن سعر الدولار انخفض بشكل واضح تحت مستوى ال 49 جنيه، وده تطور اقتصادي مش بسيط.
طب إيه اللي خلى الدولار ينزل؟
بص يا سيدي، السبب الأساسي هو تحسن السيولة الدولارية، وإن البنك المركزي اشتغل على إصلاحات قوية ساعدت في توحيد سعر الصرف، وده زود من تدفقات النقد الأجنبي.
كمان، تحويلات المصريين في الخارج زادت ووصلت ل 32.8 مليار دولار خلال 11 شهر بس، ده غير إن الاحتياطي النقدي الأجنبي عند البنك المركزي وصل ل 48.7 مليار دولار في آخر يونيو، واللي دعم السوق كمان هو زيادة الصادرات وارتفاع إيرادات السياحة اللي متوقع توصل ل17 مليار دولار بنهاية السنة، فكل ده قلل الضغط على الدولار، فابتدى سعره يتراجع قدام الجنيه.
لكن مش دي بس الأسباب، ذه في عوامل خارجية كمان لعبت دور، والدولار نفسه عالميا بدأ يضعف بسبب السياسات التجارية الأمريكية وانخفاض سعر النفط وقلة الطلب المحلي داخل أمريكا.
ومن الناحية التانية، الحكومة المصرية بدأت تاخد خطوات ذكية زي التوسع في مبادرات مبادلة الديون بالاستثمارات، وكمان بدأت توقع عقود استيراد بالعملات المحلية مع دول زي الصين والهند وروسيا، ضمن تجمع البريكس.
غير كده، الأيام اللي فاتت سمعنا عن صفقات بمليارات الدولارات من الكويت وقطر، وده معناه دخول استثمارات خليجية مباشرة في السوق المصري، وده كله بيزود المعروض من العملة الأجنبية.
طيب التوقعات إيه؟
الدولار ممكن يكمل نزوله ويوصل ل47 أو 48 جنيه خلال السنة دي، خاصة مع قرب ضخ تمويل من الاتحاد الأوروبي ب 4 مليار يورو، ومع استمرار زيادة التحويلات والصادرات والسياحة.
يعني الخلاصة، هي ان الدولار دلوقتي بيتراجع بس وراه شغل كبير وتغييرات محلية وعالمية، ولو الوضع فضل مستقر في الشرق الأوسط وزادت حصيلة النقد الأجنبي عندنا فممكن نعيش فترة من استقرار الجنيه وتحسن القدرة الشرائية.
لكن مهم نفتكر إن السوق دايما بيتحرك بسرعة، وأي تغيرات عالمية أو محلية ممكن تأثر عليه، فالمتابعة اليومية هي الحل لو عايز تسبق السوق بخطوة.
إخلاء مسؤولية إن موقع عاجل الإخباري يعمل بطريقة آلية دون تدخل بشري،ولذلك فإن جميع المقالات والاخبار والتعليقات المنشوره في الموقع مسؤولية أصحابها وإداره الموقع لا تتحمل أي مسؤولية أدبية او قانونية عن محتوى الموقع.
