تحدثت الفنانة سما المصري عن توبتها وارتدائها الحجاب، مشيرة إلى أنه لم تجد أحد يشجعها سوى بعد طرح الفيديو على حسابها بموقع انستجرام، حتى والدتها وشقيقتها لم يكونوا على علم بهذت القرار.
سما المصري: محدش سبب في حجابي ولا أثر عليا ألبسه
وقالت سما المصرى في تصريحات لموقع تحيا مصر: محدش سبب في حجابي ولا حد اثر عليا ألبسه انا من زمان كنت دائما بافكر البسه ودا كان واضح من بعض بوستاتي الخاصه بالحجاب بس اللي كان مانعني الفتره اللي فاتت اني كنت خائفة البسه احسن مااعملش بيه ولا التزم في لبسي بس لما اخدت قرار ارتدائه نويت باذن الله التزم باللبس اللي يتناسب مع الحجاب.
وتابعت سما حديثها: من ناحيه اللي شجعوني هو الحقيقه محدش شجعني غير بعد فيديو ارتدائي الحجاب اللي نزلته امبارح لأن الكل اتفاجا بالخطوه دي مني عشان كده التشجيع من امي واختي كان بعد لأنهم هم الاتنين محجبات فهم كانوا اكتر الناس تشجيعاً ليا في الموضوع دا.
سما المصري: عارفة أن أصدقاء الشيطان مش هيسبوني في حالي في ربنا عالم نيتي
واكدت: باذن الله هاقدر اكمل وانا عارفه بل متاكده أن الشيطان وأصدقاء السوء مش هيسيبوني في حالي بس ربنا عالم بنيتي وعشان كده هيساعدني وهو الوحيد اللي هيقف جنبي عشان اكمل.
واضافت: انا خايفه من اصدقاء السوء مش من الشيطان لان في ناس حواليا افظع من الشيطان لاني احيانا مابشوفهمش غير اصدقاء اوفياء بس هم في الحقيقه شياطين في شكل بني ادمين بس ربنا بيظهرهم ليا في الوقت المناسب.
سما المصري: توسلت للناس أنهم يسمحوا الفيديوهات من عندهم
ووجهت سما المصري رسالة لجمهورها، قائلة: احب اقول لجمهوري بعد الحجاب أنه اللي كان حاببني ومتابعني عشان شكلي الغي المتابعه لأن الشكل هيتغير تماما لكن اللي كان متابعني عشان حابب شخصيتي مش شكلي فإن شاء الله هيبقي في حاجات احلي واحسن في شخصيتي بعد كده هتنال اعجابكم بيا اكتر واكتر بإذن الله.
واستكملت: انا قلت امبارح في الفيديو رساله للناس اللي معاها فيديوهات عريانه ليا قلت لهم وتوسلت إليهم وحلقتهم بالغالي عندهم يمسحوا الفيديوهات دي من عندهم انا بارجوهم تاني يمسحوها لأن الذنب في الوقت دا مش عليا هيبقي عليكوا انتوا اللي بتنشروها.
سما المصري: الحجاب قرار طالع من جوايا ولا ابحث عن التريند
واختتم سما المصري حديثها: واخر حاجه احب اقولها للناس اللي بتقول اني عملت فيديو الحجاب عشان اطلع تريند احب اقولهم الايام الجايه هتبين هو قرار طالع من جوايا ولا بحث عن تريند وربنا وحده اعلم بالنوايا.
