صر راجعة بقوة عشان تقود اقتصاديات المنطقة.. ازاي دا هيحصل وايه اللي حصل في مصر الأيام اللي فاتت.
مصر هتقود العالم إقتصاديا بحلول 2030 ودا اللي قالته مؤسسة جلوبر رانكيد العالمية في تقرير حديث وقالت إن الاقتصاد المصري هيكون ضمن اقوى 10 اقتصاديات عالمية في قوة الاقتصاد والناتج المحلي وهتسبق اقتصاديات ضخمة موجودة دلوقتي..
طبعا دا بيتفق مع توقعات سابقة لبنوك عالمية أن مصر هتكون من بين اقوى اقتصاديات المنطقة والسابع عالمياً بعد كام سنة.. والحقيقة كل التوقعات العالمية دي واللي يتصدر من مؤسسات اقتصادية ومالية مرموقة بتأكد أن مصر ماشية في الطريق الصحيح وأن مصر في عهد الرئيس السيسي قدرت تكسر حاجز الخوف واليأس وتنطلق إلى رحاب التنمية والتطوير والتصدير والتصنيع والاستثمارات الضخمة ودا بعد ما قدرت تهزم المستحيل وتعمل بنية تحتية قوية جدا..
من الاخبار والاحداث المهمة جدا اللي حصلت الأيام الأخيرة كانت الاعلان عن تفاصيل مشروع قطري هيقلب الموازين ..
الحقيقة في تقارير كشفت إن مصر وقطر قربوا يخلصوا اتفاق كبير لإقامة مشروع سياحي باستثمارات أولية بحوالي 4 مليار دولار في منطقة علم الروم على الساحل الشمالي.
وبحسب موقع الشرق بلومبرج.. مصر وقطر بيحطوا اللمسات الأخيرة على المشروع ده اللي قيمته الأولية 4 مليارات دولار في نفس المنطقة.. وده بناءً على كلام 3 مصادر مطلعة.. من ضمنهم مسئولين حكوميين..
المشروع اللي اتفقوا عليه في اجتماع بين د مصطفى مدبولي رئيس الوزراء.. ونظيره القطري الشيخ محمد بن عبد الرحمن آل ثاني.. هيكون عبارة عن مدينة سياحية متكاملة على مساحة ضخمة توصل لـ 60 ألف فدان.. ودي هتتخصص بنظام حق الانتفاع لجهاز قطر للاستثمار.
المخطط الأولي للمدينة هيشمل منتجعات سياحية عالمية.. ووحدات سكنية فاخرة.. ومراكز تجارية وترفيهية.. وكمان مرسى لليخوت ومرافق متطورة.. حاجة كده على غرار مدينة رأس الحكمة.
الأسبوع دا حصلت حاجة مهمة جدا وهي اجتماع نائب رئيس مجلس الوزراء للتنمية الصناعية ووزير الصناعة والنقل الوزير كامل الوزير مع المجموعة الوزارية للتنمية الصناعية بحضور وزراء ومسئولين كبار.
الاجتماع ناقش 3 طلبات مقدمة من شركات صناعية لإقامة مشروعات بنظام المناطق الحرة الخاصة منها مشروع تصنيع ألواح وأرضيات PVC في المنطقة الصناعية بمدينة العلمين الجديدة باستثمارات 108 مليون دولار ويوفر 2150 فرصة عمل في قطاع الملابس الجاهزة.
ومشروع تاني تصنيع ملابس جاهزة في منطقة الصناعات المتوسطة بمدينة بني سويف الجديدة باستثمارات 30 مليون دولار ويوفر 9 آلاف فرصة عمل.
والمشروع التالت عبارة عن تصنيع المنسوجات بمدينة العاشر من رمضان بمحافظة الشرقية باستثمارات 78.5 مليون دولار ويوفر 4 آلاف فرصة عمل.
اللجنة وافقت على التلات مشروعات بعد ما استوفت كل الشروط المطلوبة بنظام المناطق الحرة الخاصة.
ومن الأحداث المهمة كمان في مصر كانت زيادة الاستثمارات الألمانية في مصر لمستويات جديدة وبداية مرحلة تانية في العلاقات الاقتصادية بين مصر والوحش الأوروبي الكبير ..
ولو متابعين هنعرف إن الوزيرة الألمانية للتعاون الاقتصادي والتنمية ريم العبلي واللي من اصل عراقي، وصلت مصر، وقابلت الدكتورة رانيا المشاط، وزيرة التخطيط، ومعاها كمان وزير الخارجية بدر عبد العاطي، في مؤتمر صحفي مهم جدا.
والرسالة هنا كانت واضحة، وهي ان المانيا مش جاية تتفرج، لا دي جاية تستثمر، عشان كده الدكتورة رانيا قالت إن الزيارة دي مش بس مجاملة دبلوماسية دي تأكيد على الشراكة القوية بين مصر وألمانيا، خاصة إن دي أول زيارة للوزيرة الألمانية خارج أوروبا من ساعة ما مسكت منصبها.
والموضوع كمان مش مجرد كلام، دي لغة الأرقام بتقول ان في 1600 شركة ألمانية شغالة في مصر، وكمان حجم استثمارات أكتر من 6 مليار يورو، وأهمهم سيمنز مرسيدس وبوش وديورافيت وبايروساب، كمان التبادل التجاري بين البلدين قرب من 7 مليار يورو.
الاستثمارات الألمانية بتدخل في قطاعات حيوية جدا، زي مثلا الطاقة والتحول الأخضر، وكمان الصناعة والبنية التحتية، ده غير التعليم الفني وريادة الأعمال وكمان دعم الشركات الصغيرة والمتوسطة.
يعني ببساطة، فب دعم مباشر للقطاع الخاص وكل ده بيفتح فرص عمل حقيقية للمصريين، وكمان في مشاريع ضخمة جاية كمان، وده لان ألمانيا خصصت 258 مليون يورو عشان تدعم مشروع مصر العملاق "نوفي"، وده اللي بيركز على الطاقة الخضرا، يعني طاقة شمسية ورياح وهيدروجين أخضر، والكلام ده كله في المنطقة الاقتصادية لقناة السويس.
وكمان، في حاجة اسمها مبادلة ديون، فمصر وألمانيا عندهم اتفاق مهم اسمه "مبادلة الديون من أجل التنمية"، يعني بدل ما ندفع ديوننا كاش، بندفعها على هيئة مشاريع تنموية، زي التعليم الفني والصحة ومدارس التكنولوجيا والمياه والصرف الصحي، وقيمته وصلت ل340 مليون يورو، وفي شريحة جديدة ب100 مليون يورو هتتفعل قريب.
إخلاء مسؤولية إن موقع عاجل الإخباري يعمل بطريقة آلية دون تدخل بشري،ولذلك فإن جميع المقالات والاخبار والتعليقات المنشوره في الموقع مسؤولية أصحابها وإداره الموقع لا تتحمل أي مسؤولية أدبية او قانونية عن محتوى الموقع.
