يا ترى إيه قصة الاستثمارات الكويتية اللي جاية لمصر، هل ممكن نشوف اتفاقيات ومشروعات عملاقة جاية في الطريق ولا مجرد كلام، وإزاي هتفرق معانا كمصريين؟
في خبر حلو حصل الأيام دي، وهو ان الكويت جاية بكل تقلها تستثمر في مصر، وده اترجم من خلال زيارة رسمية مهمة جدا لدولة الكويت، عملها المهندس كامل الوزير، نائب رئيس الوزراء ووزير الصناعة والنقل، وكمان عمل لقاءات مع كبار المسؤولين هناك، عشان يفتح باب استثمارات وتنمية ماحصلتش قبل كده.
والبداية كانت بجلسة مباحثات مع وزيرة الأشغال العامة الكويتية الدكتورة نورة المشعان، واللي أكدت إن في تعاون كبير جاي بين البلدين، في مجالات زي تطوير وصيانة الطرق والكباري وخطوط سكك حديدية جديدة وكمان مشروع ربط الكويت بالسعودية بقطر سريع وتطوير وإدارة الموانئ البحرية، يعني الموضوع مش كلام ده الشغل موجود على الأرض.
والمفاجأة هنا، ان كامل الوزير راح ومعاه 17 شركة مصرية تقيلة في البنية التحتية زي المقاولون العرب و السويدي وحسن علام وأوراسكوم وكونكورد، يعني الكفاءة والخبرة موجودة.. والدعوة مفتوحة للمشاركة في المشروعات الكويتية الكبرى.
وده مش بس كلام اجتماعات، ده في مشروعات كبيرة هتبدأ قريب جدا زي،ذ تطوير ميناء الشعيبة الكويتي ومشروعات ضخمة في الكهرباء وتحلية المياه ومدن سكنية جديدة هتتبني بنظام "المطور العقاري"، وكمان تم طرح فكرة المنطقة الصناعية التكاملية بين مصر والكويت، يعني جزء من التصنيع يبدأ في مصر ويكمل في الكويت والعكس، زده بيفتح الباب لتصدير البضائع للدول الأوروبية والإفريقية من غير تعقيد ولا جمارك تقيلة.
وعشان نكون واضحين، ذه كله حصل بعد زيارة الرئيس عبد الفتاح السيسي للكويت في أبريل 2025، واللي فتحت باب استثماري جديد مبني على الثقة والعلاقات التاريخية، وبالفعل تم مناقشة تحويل الوديعة الكويتية في البنك المركزي المصري إلى استثمارات حقيقية، يعني مش فلوس نايمة لأ دي فلوس هتشتغل وتعمل شغل على الأرض.
لكن السؤال اللي بيطرح نفسه، هو ايه اللي خلى الكويت تتحرك وتستثمر في مصر بالشكل ده؟
الإجابة بسيطة، وهي بيئة استثمارية جديدة وقوانين مرنة وشركات مصرية عندها سجل حافل من الإنجازات وكمان مناخ سياسي واقتصادي مستقر، والأهم إن مصر دلوقتي مش بتستنى المستثمر، لأ دي بتسعى وبتعرض فرص حقيقية في النقل والصناعة والكهرباء والإسكان.
والمواطن العادي، أكيد هيحس بالفرق، لأن كل استثمار جديد يعني فرص عمل أكتر وكمان تنمية في كل محافظة، يعني اللي جاي مبشر جدا، واحنا على أعتاب مرحلة جديدة من التكامل المصري الكويتي، اللي ممكن يكون نموذج يحتذى به لباقي الدول العربية.
إخلاء مسؤولية إن موقع عاجل الإخباري يعمل بطريقة آلية دون تدخل بشري،ولذلك فإن جميع المقالات والاخبار والتعليقات المنشوره في الموقع مسؤولية أصحابها وإداره الموقع لا تتحمل أي مسؤولية أدبية او قانونية عن محتوى الموقع.
