علق الإعلامي تامر أمين، على رغبة وسام أبو علي مهاجم النادي الأهلي في الرحيل عن الفريق، مشيرا إلى أنه قرر المغادرة من الباب الصغير.
وقال أمين خلال برنامج "أخر النهار" المذاع على قناة "النهار": "القصة الأولانية سهلة واعتقد أنها خلصت وهي مسلسل طول وبوخ واستب طبعا في تطويله وبواخته هو اللاعب وسام أبو علي نظرا للسلوك اللي هو عمله".
وأضاف: "احنا طول عمرنا بنقول الكلام ده وانا بردده على طول ياما لاعيبه في الأهلي مشيوا ما عندناش مشكلة ولسه بنحبهم لحد النهاردة هي الفكرة في الطريقة اللي مشيوا بيها ما عندناش مشكله إن أي حد عايز يشوف طريقه".
وتابع: "حمدي فتحي ساب الأهلي ومشي وجمهور الأهلي ودعه بالورود أحمد فتحي ساب الأهلي ومشي والجمهور ودعه بالورود مش عارف مين ساب الاهلي ومشي والجمهور الاهلي ودعه بالورود لكن في ناس مشيت زي عصام الحضري الناس ما قدرتش تنسى له الطريقة اللي مشي بيها في واحد زي رمضان صبحي الجمهور الأهلي ما قدرش ينسى الطريقه اللي مشي بيها".
وأوضح: "كذلك انت يا وسام قررت أن تنهي مشوارك مع الأهلي بس بطريقة ممكن ان تخرج من الباب الصغير بدلا من أن تخرج محملا بالدعوات والتبريكات والشكر والورود من جماهير الأهلي".
وأكمل: "لكن في النهاية كل واحد بيتحمل قراراته أنا بقول لحضراتكم خبريا اعتبروا أن وسام أبو علي خلاص خارج النادي الأهلي اعتقد أنه الاتفاق تم ما بين الأهلي وما بين نادي كولومبوس الأمريكي ولا يتبقى إلا توقيع العقود يمكن خلال الساعات القادمة".
واختتم: "ألف سلامه يا وسام ارحل وابحث عن دولارات وابحث عن نجاح في حته أخرى بس أنا بقول لك أهو وأنا مبضربش الودع بس الله أعلم باللي جاي بس اليوم اللي هتكتشف فيه سوء اختياراتك وتحاول تخبط على الباب تاني بص على اللي سبقوك وعملوا زي اللي انت عملته وشوف كان مصيرهم أيه".
